Бүгін саяси қуғын-сүргін және ашаршылық құрбандарын еске алу күні. 1997 жылдан бері 31 мамыр жаппай қуғын-сүргінге, жер аударуға және ашаршылыққа ұшыраған миллиондаған адамға тағзым ету күні болып аталып өтеді.
Зерттеушілердің деректеріне сүйенсек, 1927-1953 жылдар аралығында Қазақстанда 100 мыңнан астам адам қуғын-сүргінге ұшырап, 25 мыңнан астамы ату жазасына кесілген. 1993 жылы елімізде «Жаппай саяси қуғын-сүргін құрбандарын ақтау туралы» заң қабылданды. Бұл-тарихи әділеттілікті қалпына келтіруге бағытталған маңызды қадам болды. Заң негізінде мыңдаған жазықсыз жапа шеккен азаматтардың есімдері ақталды.
