«Болашақ» халықаралық бағдарламалар орталығы стипендия жеңімпаздарының тізімін жариялады, деп хабарлайды Egemen.kz.
Халықаралық бағдарламалар орталығының мәліметінше, шетелде кадрлар даярлау жөніндегі Республикалық комиссияның шешімімен 189 қазақстандық халықаралық «Болашақ» стипендиясының иегері атанды.
«Биыл конкурс жаңа кезең-кезеңімен іріктеу ережелері бойынша өтті. Бұл үдеріс кешенді тестілеу мен жеке әңгімелесуді қамтиды. Жаңа стипендиаттардың ішінде 164 адам магистратурада, 10 адам докторантурада оқиды, ал 15 қазақстандық әлемнің жетекші университеттері мен орталықтарында кәсіби тағылымдамадан өтеді», делінген хабарламада.
Айта кетейік, 2024 жылы «Болашақ» халықаралық стипендиясы 150 қазақстандыққа берілген болатын.
Еске сала кетейік, «Болашақ» стипендиясына құжат қабылдау 2025 жылғы наурызда басталған. Шетелде кадр даярлау кезінде басымдық инженерлік-техникалық және медициналық мамандықтарға беріледі.
