Жасөспірімдер арасындағы V Азия Пара ойындарында Қазақстанның голбол құрамасы алғаш рет алтыннан алқа тағып, тарихи жетістікке қол жеткізді, деп хабарлайды Egemen.kz.
Қазақстан құрамасы бастапқы кезеңде Оңтүстік Кореяға 9:10, Иран командасына 3:5 есебімен жеңілсе де, команда ойын жүйесін реттеп, тактикалық тұрғыда жинақталып, кездесулердің барысын өз пайдасына шеше білді. Нәтижесінде отандас голболшылар Сауд Арабиясын 12:7, Таиландты 11:1 есебімен жеңіп, плей-офф кезеңіне жолдама алды.
Жартылай финалда Қазақстан құрамасы Иран командасын 7:5 көрсеткішімен ұтып, финалдық бәсекеде Оңтүстік Корея құрамасынан 9:6 есебімен басым түсіп, жарыстың алтын жүлдегері атанды.
«Жарыс барысында барлығы алты ойын өткіздік. Спортшылар жарысқа жақсы дайындықпен келді. Мемлекет қолдауымен Алматы мен Астанада оқу-жаттығу жиындары ұйымдастырылды. Нәтижеге көңіліміз толады. Команда құрамындағы алты спортшының төртеуі үшін бұл алғашқы халықаралық жарыс болғанына қарамастан, олар өздерін жоғары деңгейде көрсете білді», деді бас бапкер Андрей Шпехт.
V Азия Пара ойындары осы айдың 10-13 күндері Дубайда (БАӘ) өтті. Дүбірлі додада еліміз неше медаль алғанын осыған дейін жазғанбыз.
