Ақтауда қайтыс болған ер адамның жүрегі күту парағында тұрған науқасқа салынды. Бұл – өңірдегі алғашқы мәйіт доноры. 42 жастағы марқұмның миы жұмысын тоқтатқаннан кейін туыстары донорлыққа келісім берген.
Ағзаны алу операциясы Маңғыстау облыстық көпбейінді ауруханада жасалды. Кейін санитарлық авиация донор жүрегін Астанаға жеткізді. Осылайша, мәйіт доноры бір адамның өмірін сақтап қалды. Жалпы өңірде 175 адам ағза ауыстыру кезегінде тұр. Олардың төртеуі – кәмелетке толмаған балалар.
Индира Аманқосқызы , Республикалық трансплантология орталығының үйлестірушісі:
- Егер осындай мәйіттік донорлық болатын болса, бір адам кезекте, күту парағында тұрған алты адамның өмірін құтқара алады. Бұл ретте медициналық көрсетілімдер бойынша тек жүрегін алуға мүмкіндік болды. Келісім берілгенінің арқасында осындай ота жүргізілді. Науқастың туыстарына біздің алғысымыз шексіз.
