Шымкентте тұрғындардың қауіпсіздігі үшін «жедел қызметтер» кешені ашылды.
Елтай және Таскен шағын аудандарында бой көтерген көп салалы бекетке өрт сөндірушілер, жедел жәрдем және полиция қызметкерлері шоғырланып, шұғыл әрекет етуге жұмылдырылды. Басты мақсат қала орталығынан шалғай орналасқан халыққа сапалы қызмет көрсету.
Тың бастама «Аумақты дамыту жоспары» аясында жүзеге асты. Бірегей кешеннің ашылу рәсіміне Төтенше жағдайлар министрі мен қала әкімі Ғабит Сыздықбеков және сала жетекшілері арнайы қатысты. Нысанның кілті салтанатты жағдайда табысталып, жедел қызмет өкілдеріне зор сенім артылды.
Шыңғыс Әрінов, ҚР Төтенше жағдайлар министрі:
- Осындай кіші болса да заманауи өте функционалы мықты деполарды әлі салатын боламыз. Бұл тәжірибені бүкіл елге үлгі қылып, оны тарататын боламыз. Осының бәрі Президентіміздің нақты тапсырмасы болатын. Отбасыларыңызға амандық, жақындарыңызға тек жақсылық тілеймін.
Көп салалы кешеннің құрылысы жергілікті бюджеттен қаржыландырылып, алты айдың ішінде бой көтерді. Ыңғайлы жер телімі таңдалып, жедел қызметтердің жұмысы үйлестірілді. Енді олар оқиға орнына бірге шығады.
Батырхан Әшетов, қала тұрғыны:
- Төтенше жағдайлар болатын болса қызмет келгенше талай уақыт өтіп кететін еді. Мынау өте дұрыс болды. 5 минут дейді, ең әрі кетсе 7 минут деп отыр. Халықтың атынан көп рақмет.
Ғимарат заманауи стандарттар мен қауіпсіздік талаптарына сай салынған. Жеке қызметтік кабинеттер, құтқарушыларды даярлауға арналған оқу мұнарасы, асхана және жатын орындар қарастырылған. Қажетті материалдық-техникалық құрал-жабдықтармен қамтамасыз етілген.
Нұрболат Шындәулетов мердігер мекеме өкілі:
- Жедел жәрдем мен полиция қызметкерлеріне де арнайы жеке-жеке тұрақ және іште арнайы сабақ өтетін сыныптар бар. Шұғылданатын алаңдарын қосымша жасап, тапсырдық.
Айта кетейік, дәл осындай көпсалалы кешен жыл соңына дейін Сәуле шағын ауданында да қолданысқа беріледі. Ал келесі жылы қала маңындағы жеті тұрғын алапта салу жоспарланған.
Нұрсұлтан Мұхамеджан, Нұрмахан Мұсатов
