Қазақстан Қатардағы әскери оркестрлер фестиваліне барады, деп хабарлайды 24KZ. 10–21 желтоқсан аралығында өтетін шараға Қарулы Күштердің Ұлттық әскери-патриоттық орталығы ұжымдары қатысады.
Биылғы республикалық іріктеуге 115 адам қатысып, 70-і жеңімпаз атанды. Ұлттық әскери орталық Қарулы Күштер арасындағы халықаралық іс-шараларда бірнеше мәрте өнер көрсетті. Бұл мекеме жастарды елдің тарихы мен мәдениеті арқылы патриоттық тәрбиеге баулуды мақсат тұтады.
Алмас Ибрагимов, ҚР Қарулы Күштерінің бас әскери дирижері, подполковник:
- Орталық әскери оркестр жыл сайын түрлі халықаралық шараларға қатысып тұрады. Қытай, Ресей, Тайвань, Германия, Ұлыбритания сынды елдерде өнер көрсеттік. 2001 жылы оркестр Лондонда өткен фестивальде ең үздік ұжым атауына ие болды.
