Алматыдағы Ықылас атындағы халық музыкалық аспаптар музейінде көрнекті ақын, Мемлекеттік гимннің авторы Жұмекен Нәжімеденовтің туғанына 90 жыл толуына орай «Менің елім – жыр елі!» атты поэзия кеші ұйымдастырылды. Қазір бүкіл қазақ даласы Жұмекеннің сөзімен көз іліп, сонымен оянады. Әнұранға айналған сөзі мен өлеңдері арқылы. Ақынға, әсіресе алматылықтардың да ықыласы зор.
«Тастың өзі нұр шашады, бүгін-дағы, кеше де
Біздің мынау Алматыда, күн жайлаған көшеде.
Тас балқытқан талма түсте – балқимыз біз күнге ұсап,
Қызуынан алма пісті – айқасқанда мың құшақ» деген ақын ару Алматыға ынтықтырады.
Аталған поэзия кешінде Мәдениет және ақпарат министрлігінің қолдауымен шыққан Жұмекен Нәжімеденовтің таңдамалы шығармалар жинағы таныстырылды. Поэтикалық кешке зиялы қауым өкілдері, ақын-жазушылар, айтулы суреткердің ұрпақтары, студенттер мен оқушылар, сондай-ақ әдебиетсүйер қауым қатысты. Ең бастысы, өлең оқылды:
«Міне, біздің Алматы осы,
Алма төсі бұлтиып,
Алма-төске жас бұтаның саусақтары түр тиіп.
Жүрші, жаным, қыдырайық, неғыласың жалғыз қап,
Алатаудың ақ қарынан әперейін балмұздақ!», дейтін шумақтар тек Жұмекенге ғана тән.
Кеш соңында Геральдикалық зерттеулер орталығы, балалар мен жасөспірімдерге арналған республикалық «Ұлан» газеті бірлесе ұйымдастырған «Туған жерім менің, Қазақстаным» атты әңгімелер байқауының жеңімпаздары марапатталды.
Аталған байқау Жұмекен Нәжімеденовтің 90 жылдық мерейтойына және «Ұлан» газетінің 95 жылдығына орай ұйымдастырылды. Сайысқа еліміздің әр өңірінен 50-ден астам оқушы қатысты.
Сонымен қатар іс-шара барысында «Ұлан» газетінің жас тілшілеріне арнайы куәлік табысталды.
Бекжан Бақытұлы
