1 маусым – Балаларды қорғау күні қарсаңында «Кибер Тұмар» республикалық акциясын Цифрлық даму, инновациялар және аэроғарыш өнеркәсібі министрлігі «Қазақстан балалары» бағдарламасы аясында ұйымдастырып отыр. Бұл – балаларға арналған цифрлық мамандықтар мен киберқауіпсіздік күні, деп жазады Egemen.kz.
Акцияға еліміздің түкпір-түкпірінен келген мектеп оқушылары – пәндік олимпиадалардың жеңімпаздары мен әлеуметтік мекемелер тәрбиеленушілері қатысып жатыр.
Маңызды шаралардың бірі – «Ғарышқа жол» жобасы бойынша өткен Ұлттық ғарыш орталығына танымдық экскурсия болды. Іс-шараны «Қазақстан Ғарыш Сапары» ҰК» АҚ және оның серіктесі «Ghalam» ЖШС бірлесе ұйымдастырды. Оқушылар компания басшылығының құттықтау сөзін тыңдап, аталған компанияның қызметі туралы бейнеролик тамашалады. Одан кейін олар ғарыш аппараттарын құрастыру-сынақ кешеніне барып, нағыз өндірістік ортаның қалай жұмыс істейтінін көрді.
Бұл туралы gharysh.kz сайтының жазуынша экскурсия барысында оқушылар спутниктердің қалай жасалатынын, қалай сынақтан өтетінін және қазіргі заманғы ғарыш технологияларының негізінде не жатқанын өз көздерімен көрді. Орталық инженерлері мен мамандары өз жұмыстары туралы айтып, процестің негізгі кезеңдерін көрсетті.
«Әрбір бала ғарыш алыс арман емес, бүгінде қолжетімді нақты мамандық екенін білсе дейміз», дейді ұйымдастырушылар.
Экскурсия оқушылардың таным көкжиегін кеңейтіп қана қоймай, нағыз шабыт көзіне айналды. Көптеген балалар болашағын инженерия, ғылым және технология салаларымен байланыстыру туралы ой түйді.
