Қостанайлық өнертапқыштың медициналық ІТ стартап жобасы елде үздік деп танылды.
«EpiQ AI» (Эпик эй-ай) деп аталатын ақпараттық технология дәрі-дәрмек, реагенттерді сатып алу рәсімін оңтайландырады. Орынсыз шығынды азайтады.
Мемлекет басшысы денсаулық сақтау саласына жасанды интеллект технологиясын кеңінен енгізу мемлекеттің цифрлық саясатының басым бағытының бірі екенін атап өтті. Осы міндетті жүзеге асыруда қолға алынған ілкімді істер аз емес. Соның ішінде қостанайлық Диана Майлыханованың ұсынған ақпараттық технологиясы республикалық байқауда үздік деп танылды.
Диана Майлыханова, медицина саласында ЖИ дамыту бойынша менеджер:
- Бұл ІТ жоба зертханалық реагенттерді сатып алу ісін жоспарлап, оңтайландыруға мүмкіндік береді. Медициналық препараттардың пайдалану мерзімінен асып, жарамай қалуы немесе қосымша сатып алуға қаржы бөлу сияқты артық шығыннан сақтандырады. Жасанды интеллект арқылы осы саладағы шығынды 30-40 процентке азайтуға болады.
Диананың ақпараттық жүйесін жетілдіруде 16 адамнан тұратын бүтін бір команда жұмыс істеп жатыр. Олар жобаны Ғылым және жоғары білім министрлігінің грантына ұсынған. Сонымен қатар қаржылай қолдау көрсететін инвесторлар іздестіріп жатыр. Ал Елена Симанчуктың ІТ жобасы егіншілікпен байланысты. Оның құрастырған веб-порталы арқылы алқапты араламай, астықтың шығымын компьютермен бақылап отыруға болады.
Елена Симанчук, жоба жетекшісі:
- Мұнда спутниктен түсірілген карта, ауа райы деректері, өсімдіктің хлорофилл денгейін анықтайтын индекс мәліметтері жинақталған. Соның бәрін жасанды интеллект жүйелеп отырады. Мысалы, мынау жасыл түсті аумақта өнім шығымдылығы жақсы, сары, қызғылт жерлерді не қуаңшылық, не ауру жайлаған. Яғни бүтін бір алқапты нақты бір тұстарын өңдеп шығу керек.
Екі жыл бұрын құрылған «Қостанай Хаб» орталығы бүгінде ойы ерек жастардың инновациялық идеялар алаңына айналған. Жергілікті ІТ-қауымдастықтың бастамалары осында пісіп жетіледі.
Дәмір Мінайдаров, "Қостанай хаб" директоры:
- Біз екі жыл істегенде біздің 90 жоба қатысты, Қазір біз 10 стратаптармен бірге жұмыс істеп жатырмыз. Әрбір салада. Әзірге екеу еңгізіліп отыр. Олар қазір инвестиция тартады өздеріне. Общий фонд 300 мың доллар қазір екі стартапта.
Мағауия Қалиев, тілші:
- Бүгінде цифрлық технология өндіріске дендеп енген. Мынау Қостанайдағы автозаводтың жедел орталығы. Заводтың өне бойындағы 600-ден астам камераның түсірілімі осы жерде тоғысады. Ал жасанды инттелекті сол арқылы қай тұста ақау бар, қай тұста қауіпсіздік талаптары бұзылды, тіпті адам сүрініп кетсе де түсіріп белгі береді.
Мағауия Қалиев, Сергей Трахтенберг
