Мәжіліс депутаты, «Ақ жол» фракциясының мүшесі Олжас Нұралдинов Қаржы нарығын реттеу және дамыту агенттігінің төрайымы Мәдина Әбілқасымоваға ислам банкингін дамыту мәселесін және оны Қазақстанда толық енгізуге заңнамалық база дайын ба деген сұрақ қойды.

Депутат атап өткендей, жаңа заң жобасында дәстүрлі банктерде «ислам терезелерін» ашу арқылы ислам банкингін дамыту ұсынылған.

«Қазіргі уақытта еліміздегі ислам банктерінің үлесі жалпы қаржы нарығының небәрі 0,2–0,3%-ын құрайды және олар тек үш банк арқылы ұсынылады. Сонымен қатар, ислам инвестицияларының әлеуеті шамамен 3 триллион теңге деп бағалануда. Бұл қаражатты ислам құқық нормаларын сақтай отырып, экономиканы дамытуға пайдалану мүмкіндігі бар», — деді Нұралдинов.

Сондай-ақ ол «Ақ жол» фракциясы ислам банкингі өнімдерін кеңейту және ислам қаржыландыру принциптеріне сай транзакцияларға қосымша талаптар енгізу бойынша ұсыныстар әзірлегенін жеткізді.

Депутат агенттік басшысынан: «Біздің ұсыныстарға қатысты агенттіктің ұстанымы қандай және қолданыстағы заңнама Қазақстанда ислам банкингін толық іске қосуға жеткілікті ме?» — деп сұрады.

Мәдина Әбілқасымова елдегі ислам банкингі сектор әлі шағын екенін, бірақ оны дамыту үшін нақты шаралар қолға алынғанын растады.

«Рас, бізде екі ислам банкі бар, бірақ олардың үлесі өте аз. Сондықтан заңнама аясында әмбебап лицензиясы бар банктерге ислам терезелерін ашу мүмкіндігін жасадық», — деді ол.

Әбілқасымованың айтуынша, ислам банкингін реттейтін ережелердің көпшілігі заңнамада қарастырылған. «Біз сондай-ақ барлық ислам қаржыландыру активтері мен міндеттемелері үшін бөлек есеп жүргізуді енгіздік. Әр банк шариғатқа сай ислам кеңесін құруы тиіс», — деп түсіндірді агенттік басшысы.

Сонымен қатар, депутаттардың ұсыныстары, оның ішінде қосарланған салық салуды жою және құқық қорғау тәжірибесіне негізделген басқа да ережелер ескерілгенін атап өтті.

«Барлық ұсыныстарды қарастырдық, қосарланған салық мәселесін де назарға алдық», — деді Мәдина Әбілқасымова.