Нұрсұлтан Назарбаев Қоры мен серіктестерінің Атырау облысындағы сапары аясындағы маңызды іс-шаралардың бірі білім беру жобаларының таныстыр
Нұрсұлтан Назарбаев Қоры мен серіктестерінің Атырау облысындағы сапары аясындағы маңызды іс-шаралардың бірі білім беру жобаларының таныстырылымы болды.
Атырау қаласындағы №48 орта мектепте «El umiti» корпоративтік қоры білім бөлімдерінің басшылары мен мектеп директорларына арналған роуд-шоу өткізді. Іс-шара барысында Қор қызметкерлері жүзеге асырылып жатқан жобалардың мақсаты туралы айтты.
«El umiti» өкілдерінің айтуынша, «Smart Ustaz» жобасы мұғалімдерге балалардың эмоциясын тану, олардың психофизиологиялық даму ерекшелігін анықтау дағдысын дамытуға көмектеседі. Ал «Qabilet» қызметі оқушылардың қабілетін анықтау, кәсіби бағдар беру, дарынды балалардың әлеуетін ашу мен қолдау жүйесі болып табылады.
Бұған қоса, осы күндері мұғалімдерге, психологтар мен мектеп директорларына арналған «Педагогикалық қызметтегі эмоционалдық күйіп кетудің алдын алу. Эмоциялық интеллект (EQ) / Эмпатия»; «Оқушылардың қабілетін диагностикалау және мектеп жасындағы балаларда «4К» дағдысын дамыту әдістемесі» атты тақырыпта тренингтер өтіп жатыр.
Ал «Пікірталасты дамыту» атты дәріс студенттер мен оқушылар үшін шешендік өнерді меңгеруде құнды ақпарат көзіне айналды.
Ертең сондай-ақ, «Айтыс өнері» бойынша тренинг өткізілмек.
