Қазақстанның IT саладағы жылдық табысы бір жарым млрд долларға жетті. Бұл – бұрын-соңды болмаған рекордтық көрсеткіш.
Жалпы кірістің басым бөлігі экспортқа тиесілі. Бұл жайында Дубайда өткен ірі технологиялық көрмеде айтылды. Елімізден барған делегация жергілікті венчурлық қор өкілдерімен кездесіп, екіжақты ынтымақтастық аясын кеңейтті.
Технология саласындағы әлемдік алпауыт компаниялар қатысқан көрмеге биыл елімізден алғаш рет ірі делегация келді. Ұлттық павильон Қазақстанда ойлап табылған озық өндірістік жобалар мен стартап және цифрлық шешімдерді әр қырынан көрсетті. Сауда министрлігі ұйытқы болып, елшілік кеңінен қолдау танытқан іс-шара экспорттық әлеуетіміздің артқанын аңғартып отыр. Жергілікті және әлемдік венчурлық қор жетекшілері бұл саладағы бастамаларға жоғары баға берді.
Саид Әл Гергави, Дубай Сауда палатасының Цифрлық даму бойынша вице-президенті:
- Қазақстанда талант көп. Әлемдік деңгейде танылып жүргендері қаншама. Ірі инвесторлар қызыға қарайтын нарық. Осы бағыттағы әлеуеттеріңізді дамыта берулеріңіз керек. Бизнес технологиялық тұрғыда дамыса, экономика өсіп, әлеует жақсарады. Біз әмірлікте үкімет пен кәсіпкерліктің осы саладағы байланысын бір-біріне бейімдеп, оң нәтижесін көріп отырмыз.
Қазақстандық мамандар білім беруге арналған онлайн платформадан бастап, медицина, қаржы және өндірісті автоматтандыру шешімдерін ұсынды. Бұдан бөлек, спутниктік аппараттар мен виртуалды шынайылық қондырғылары көрмеге қойылды. Жоба жетекшілері әлеуетті инвесторлармен кездесіп, ынтымақтастық жолдарын талқылады.
Оливер Тревена, кәсіпкер, технологиялық сала сарапшысы:
- Қазақстан жайлы көп естідім. Әлгінде ғана бір жақыным елдеріңіз туралы бейнежазбаларды көрсетіп, қызығушылығымды арттырды. Қазақ жерінде қандай да бір жобамен айналысуды жоспарлап жүргенмін. Көрмеден кейін жақсырақ ойланып, нақты шешімге келетін боламын.
«Отандық өнертапқыштардың мұндай халықаралық алаңда кең танылып, өзіндік жетістіктерімен мойындалуы — стратегиялық тұрғыда маңызды қадам», — дейді мамандар. Себебі қазір тұтас жаһан жасанды зерде мен сандық форматтағы шешімдерді қолдауға бет бұрған. Бұл үдерістен біздің тарап та қалыс қалмай, экспорттық нарықтарды көптеп игеруге ниетті.
Рауан Мыңбай, тілші:
- Статистикаға сай, еліміздің айти саладағы табысы былтыр 1 млрд 490 млн долларға тең болды. Соның ішінде экспорт үлесі 20 пайызға ұлғайып, 881 миллион долларға жетті. Қазір қазақстандық жобалардың бір легі Дубайда да кәдеге жаратылып, біршама пайда әкеліп жатыр. Осы үрдіс одан әрі жалғаса берсе, озық ойлы отандастарымыздың ел экономикасына қосар үлесі артады.
Авторы: Рауан Мыңбай
