Түркістанда Қазақстанның Халық артисі, көрнекті театр және кино актёрі Құрманбек Жандарбековтің 120 жылдығына арналған І -республикалық театр фестивалі басталды.
Шараға еліміздің әр өңірінен 13 театр ұжымы қатысуда. Олардың қатарында Бекен Римова атындағы Талдықорған драма театры, Астана қаласы әкімдігінің «Әзірбайжан Мәмбетов атындағы мемлекеттік драма және комедия театры» бар. Қазақстан Театрлары Ассоциациясының Президенті, Қазақстанның Еңбек Ері Асанәлі Әшімов пен қазылар алқасының төрағасы Еркін Жуасбековтың айтуынша, фестивальдің мақсаты Құрманбек Жандарбековтің шығармашылығын насихаттау. Сондай-ақ театр ұжымдары арасындағы шығармашылық байланысты нығайтып, тәжірибе алмасу. Фестиваль 16 қазанға дейін жалғасады.
Асанәлі Әшімов, КСРО және Қазақстанның халық артисі:
- Бекежанды киноға бекіткен кезде келе жатқанымда алдымнан Құрекең шықты. Құрекеңді құшақтай алдым қуанғаным сондай. Бекежанның сахнада образын шығарған Құрекең. Ол маған үлкен әсер еткен. Құшақтап, "Құреке, рольге бекітіп келе жатырмын. Сүйінші! Айыпқа бұйырмасаңыз, мен сізден кішкене ұрлаймын" дедім. Темпераментін, жүріс-тұрысын. Кейін біткеннен кейін мені құшақтап, сүйіп, "жақсы" деп бағасын берді.
