Қазіргі кезде қалада білім беру инфрақұрылымын дамыту бойынша қарқынды жұмыс жүріп жатыр, деп хабарлайды Egemen.kz.
Өңірлік коммуникациялар қызметінде өткен брифингте: «Қазір Алматы қаласында 349 мектеп бар, онда 354 мыңнан астам оқушы білім алып жатыр. Халық саны жыл сайын 12–14 мың адамға өсіп жатқандықтан 33 мыңнан астам оқушы орны жетіспейді. Қабылданып жатқан іс-шаралардың нәтижесінде биыл бұл тапшылық 16 500 орынға дейін азаяды», деп атап өтті қала әкімінің орынбасары Азамат Қалдыбеков.
Оңтүстік астанада «Келешек мектептері» жобасы да үлкен қарқынмен іске аса бастады. Бүгінгі таңда жалпы сыйымдылығы 34,8 мың оқушы орнын қамтитын 21 мектеп салынып жатыр. Жоба аясында 12 600 орындық 8 жаңа мектеп салынып, пайдалануға берілді. Қазан айының соңына дейін тағы 10 500 орындық 5 мектеп ашылмақ. Сонымен қатар, жеке инвестициялар есебінен «сатып алу» тетігі арқылы салынған 11 700 орындық 8 мектеп биыл пайдалануға беріледі. «Бұдан бөлек, 2025 жылдың соңына дейін 550 орындық бір мектепті ашып, жалпы сыйымдылығы 2 100 орынды 2 мектепті сатып алып, 6 мектепке жапсаржайлар салу жоспарланған. Бұл қосымша 1 795 орын береді.
Сонымен қатар «2025–2027 жылдарға арналған 1300 мектепті жаңалау» жобасы іске асырылып жатыр. Онда 31 мектептің тізімі бекітілген. Биыл 15 мектепте жөндеу-қайта жаңарту жұмыстары жоспарланған, олардың алтауында (№160, 73, 60, 50, 30 және 124) құрылыс жұмыстары басталып кетті. Келер жылы тағы 9 мектеп, 2027 жылы 7 білім беру нысаны жаңартылады. Жаңарту бағдарламасын жүзеге асыру мектептердің жалпы сыйымдылығын шамамен 5 мың орынға арттырып, ғимараттардың сейсмотұрақтылығын күшейтіп, мұғалімдер мен оқушыларға жайлы жағдай жасауға мүмкіндік береді.
Алматы
