Бала смартфон емес, сыныптасымен дос болу керек. Үлгерімінің төмендеп, ортасынан түңілуі көбіне – телефонға үңілуден туындайтын мәселе.
Бұл әлемдегі әлеуметтік зерттеулерде әлдеқашан дәлелденген. Яғни, психологиялық тұрақтылығына кері әсер етеді. Сондықтан Мәжіліс депутаты мектепте смартфонға тыйым салуды ұсынды. Елнұр Бейсенбаев осы шектеу арқылы оқушылардың ынтасы ашылып, өзара ынтымағы артады, — деп есептейді. Әйтпесе, өрендер арасында өкпе-реніш көбейді. Жаңа оқу жылы басталғалы Жамбыл облысында үш жеткіншек қатарластары қолынан қаза тапты. Былтыр да жасөспірімдердің жанжалы жаға ұстатқан еді. 2 мыңға жуық қылмыс тіркелсе, соның 130-ы ауыр.
Елнұр Бейсенбаев, ҚР Парламенті Мәжілісінің депутаты:
- Балалар арасындағы достықты нығайту, олардың онлайн араласқанынан гөрі бетпе-бет қарым-қатынасын қалыптастыру мақсатында мектептерде жаппай смартфон пайдалануды шектеу шараларын енгізу қажет. Білім беру ұйымдарында оқушылардың қауіпсіздігін қамтамасыз ету және жасөспірімдер арасындағы зорлық-зомбылықтың алдын алу үшін барлық мектепте антибуллингтік бағдарламаны енгізу қажет.
