Түркияда интернет күнделікті өмірдің ажырамас бөлігіне айналды.
Ресми статистикаға сүйенсек, халықтың 90%-ынан астамы күн сайын желіде уақыт өткізеді. Көрсеткіш кейінгі он жылда шамамен 60%-ға артқан. Сарапшылар бұл үрдісті тек ойын-сауыққа тәуелділікпен емес, тұрмыстың цифрлануымен байланыстырады.
Түркияда жас та, жасамыс та тұрмыста интернет қолданады. Олар ғаламторда орта есеппен тәулігіне 7 сағаттан астам уақытын өткізеді. Оның ішінде әлеуметтік желіге 2 сағат 43 минутын жұмсайды. Жергілікті статистика институтының дерегіне қарағанда, 16 мен 74 жас аралығындағы азаматтардың 90,9 пайызы веб ресурстарды пайдаланады. Көрсеткіш, әсіресе, 6 мен 10 жас аралығындағы балалар арасында жоғары, 91,3 пайыз.
Телефонға телмірген балалардың дені видео көріп, үй тапсырмасын орындау үшін ғаламторға кіреді. Әсіресе, онлайн ойынға әуестік жоғары. Әлеуметтік желіге байланып, уақытын бос өткізіп жүрген жеткіншектердің де қатары артты. Десе де кейінгі дерек интернетті ойын-сауық үшін емес, тұрмыстық қызметтерді пайдалану мақсатында қолдану деңгейі өскенін айғақтап отыр. Мысалы, ел тұрғындарының 76 пайызы мемлекеттік мекемелерден онлайн режимде түрлі қызметтер алады. Сонымен қатар ғаламтор арқылы сауда да кең таралуда. Қазір Анадолы жерінде халықтың жартысынан көбі интернет арқылы сауда-саттық жасайды.
Сонер Йылдырым, Орта Шығыс техникалық университетінің профессоры:
- Пандемиядан кейін адамдар интернетте көп уақыт өткізуге үйренді. Бұрынғыдай жүзбе жүз кездесіп, араласу азайды. Бұл әлеуметтік жалғыздыққа әкелді. Азаматтардың көбі тығырықтан шығудың жолы интернетте уақыт өткізу деп, өзін-өзі жұбатады. Мұнан бөлек, технологияның дамуы адамзатты тұрмыста интернетке тәуелді ете түсті. Өйткені Түркиядағы банктік операциялардан бастап мемлекеттік қызметтерге дейін барлығы онлайн. Бұл тұрғындарды желіден ажырай алмайтын жағдайға жеткізеді.
Сарапшының айтуынша, Түркияда интернет тек ойын-сауық құралы емес, күнделікті өмірдің маңызды бөлігіне айналды. Бұл елдің цифрлық қоғамға толық бейімделгенін көрсетеді.
Авторы: Әсия Нұрлыбаева
