Блогерлер Эльмира Төлегенова мен Ерболат Жанәбіловке қатысты іс Экономикалық тергеу департаментіне берілді. Сот олардың әрекетінде қылмыстық құқықбұзушылық белгілері бар деп тапты, — деп хабарлайды Massaget.kz тілшісі.
Тиісті қаулы бүгін Астананың әкімшілік құқықбұзушылық жөніндегі мамандандырылған ауданаралық сотында жарияланды. Бүгін блогерлерге қатысты іс қаралды. Сот қылмыстық құқықбұзушылық белгілері болуына байланысты әкімшілік құқықбұзушылық туралы істі қысқарту туралы ұйғарым шығарды.
"Ерболат Нұрлыбекұлы Жанәбіловтің "Элер" ЖК-ге қатысты іс материалдары Астана қаласы бойынша Экономикалық тергеу департаментінің соталды іс жүргізу органына берілсін", — деді судья Малика Ноғайбекова.
Дау қалай өрбіді?
Бұған дейін блогерлер Instagram-да 11 көлік ойнатылатынын жариялаған болатын. Шарты қарапайым көрінген, репост жасау ғана. Алайда 21 тамызда оқырмандар тікелей эфирдің орнына құны 30 мың теңге тұратын Zhana Business ақылы курсының сілтемесін көрген. Конкурсқа тек курсты сатып алғаннан кейін қатысуға мүмкіндік берілетіні белгілі болды. Бұл жұрт арасында наразылық тудырды.
Кейінірек Жанәбіловтер ұйымдастырған даулы конкурс сотқа жетті.
Өзекті жаңалықтарды өз уақытында оқу үшін Facebook парақшамызға жазылыңыз!
