3D принтер тұрғызған ғимарат
3D принтер мүсіндер жасап қана қоймай, зәулім ғимараттар да салады. Мұндай жоба Швейцарияда жүзеге асты. Ал жасанды интеллект көмегімен табиғи апаттарды болжауға болады.
Міне, мынау Швейцарияда 3D принтер салған 30 метрлік мұнара. Оның құрылысы тікелей роботтың көмегімен жүргізілген. Ғимараттың 32 бағанасы арнайы қоспадан жасалған.
Уолтер Кауфман, ETH Цюрих университетінің профессоры:
Біз 3D технологиясы салған бетонға арматураны шебер кіріктіре алдық. Ол кәдімгі темірбетон сияқты жұмыс істейді. Дегенмен, мұның табиғаты мүлде өзгеше.
Мұнара Мюленс атты шағын ауылға қойылған. Таңдау да тегін емес. Ғимарат жылдан жылға тұрғындар саны азайып жатқан елді мекенді жандандыру үшін тұрғызылған. 23 мамырдан бастап экскурсиялар жүріп жатыр. Осылайша, жоба жетекшілері бұл бастамада инновациялық құрылыс тәсілдерін таныстырып қана қоймай, өңірдегі туризмлі дамытуға серпін бермек.
ЖИ табиғи апаттарды болжайды
Енді табиғи апаттарды болжау үшін жасанды зият жәрдемдеседі. Microsoft-тың Aurora атты ЖИ моделі ауа сапасын, дауылдар мен табиғаттың тосын құбылыстарын дер кезінде анықтауға мүмкіндік бермек. Технология деректерді спутниктерден, радарлардан, метеостанциялардан, түрлі модельдеулерден жинақтайды. Осылайша, былтыр бұл модель Филиппинде болған Доксури тайфунын арнайы мамандардан бұрын 4 күн ерте болжаған.
OpenAI кеңсесі Сеулде ашылады
Көпке танымал СhatGPT өнімін шығарған OpenAI компаниясы жаңа кеңсесін Сеулде ашпақ. Бұл – елдегі сұраныстың күрт артуына байланысты. СhatGPT-дың ақылы нұсқасын ең көп сатып алған қолданушылар АҚШ-тан кейін Оңтүстік Кореяда тіркелген. Қазірдің өзінде компания жергілікті серіктестіктерді дамыту үшін мамандар жинап жатыр.
Темірлан Нұржанұлы
