Қазақстандық боксшы Санжар Тәшкенбай 2025 жылғы әлем чемпионатында алтын медаль жеңіп алды, — деп хабарлайды Massaget.kz тілшісі.
Англияның Ливерпуль қаласында өткен турнирдің финалында 50 келі салмақ дәрежесінде ол моңғолиялық Баттулга Алдархишигпен кездескен.
Бірінші раундтан бастап Санжар айқын басымдық танытып, қазылар бірауыздан (5:0) ұпай берді. Екінші және үшінші раундта да жағдай өзгерген жоқ. Нәтижесінде, Санжар Тәшкенбай қарсыласын 5:0 есебімен ойсырата жеңді.
Бұл жеңіс Қазақстан құрамасы үшін Ливерпульдегі алғашқы алтын болды. Бұған дейін Назым Қызайбай финалда үндістандық боксшыға есе жіберіп, күміс жүлдегер атанған еді. Ерлер арасында алтын медальді ең алғаш әкелген де — Санжар.
Айта кетейік, Тәшкенбай екі жыл бұрын, небәрі 19 жасында Ташкентте өткен ересектер арасындағы әлем чемпионатында жеңімпаз атанған болатын. Осылайша ол қазақ боксы тарихында екі дүркін әлем чемпионы атанған Серік Сәпиевтен кейінгі екінші спортшы болып отыр.
Сонымен қатар, қазақстандық боксшылар Ливерпульдегі әлем біріншілігінің алты финалында өнер көрсетеді.
Бұған дейін Виктория Графеева (60 кг дейін) мен Елдана Тәліпова (+80 кг) қола жүлде иеленсе, Назым Қызайбай (48 кг дейін) күміс алған еді.
Instagram парақшамызға жазылып, ең қызықты ақпараттарды бірінші болып оқыңыз!
