Лифт ішінде жасөспірім шабуыл жасап, зардап шеккен 5 жасар Батырдың еміне анасы ақша жинай бастады. Халықтың берген қаржысына баланы шетелге апарып қаратамын деп отыр. Еске салсақ, ақпан айында Астанадағы тұрғын үй жеделсатысының ішінде шизофрения диагнозы бар 14 жастағы жасөспірім 5 жасар балаға шабуылдап, бетіне пышақ сұғып алған еді. Сол оқиғаны еске түсірсек...
Осы оқиғадан кейін ұзақ ем қабылдаған бүлдіршін әлі толық сауыққан жоқ. Дәрігерлер оған сол жақ бет жүйкесінің нейропатиясы деген диагноз қойған. Яғни баланың сол жақ беті мүлде қозғалмайды. Анасының айтуынша, ұлына ұзақ мерзімді күтім мен оңалту курстары қажет. Ал физиотерапия мен басқа да медициналық шараларға қаражат жетіспейді. Бетінде тыртық қалып, кейін өміріне кедергі болмас үшін шетелге барып ота жасатуды көздеген олар жұрттан жылу жинап жатыр. Анасын тыңдап алсақ...
Айнұр, зардап шеккен баланың анасы:
Қасы көтерілмейді, таңғалған кезде орнында тұр қасы көтерілмейді. Көзді жұмған кезде кішкене осылай ашық боп тұрады. Күлген кезде беті тартылмайды. Езуі істемей тұр. Ең бірінші жұмысқа тұрса да, адаммен сөйлессе де, жеке өмір болса да беті өте үлкен рөлі ойнайды адамның өмірінде. Сол үшін қатты уайымдаймын. Алдағы өмірі комплекссіз өтсе екен деген тілегім бар.
Ал баланың бетіне пышақ салған жеткіншек психикалық диспансерде есепте тұрғандықтан қылмыстық жазаға тартылған жоқ. Жасөспірімді Алматы облысы, Талғар ауданындағы жабық мекемеге стационарлық мәжбүрлеп емдеуге жіберу туралы шешім қабылданды. Алайда бұл қаулы әлі заңды күшіне енген жоқ. Ал ұлын жалғыз өсіріп отырған анасына 78 640 теңге айыппұл салынды.
Ернұр Медет
