Елде Отанына отбасымен қызмет етіп жүрген жандар көп. Ерлі-зайыпты Рахметовтар ұзақ жылдар бойы құтқарушы болып қызмет етіп келеді, деп хабарлайды 24kz.
Бір салада жүргендіктен бір-бірін айтпай түсінеді. Отбасының берекесін сақтауға да осы қасиеттері себеп.
Рахметовтар отбасы үшін таң ерте атады. Себебі олар 08:00-ден бастап өрт сөндіру бөлімінде болуы керек. Отағасы бөлім бастығының орынбасары болса, жұбайы есепші қызметінде. «Бірақ бірге жұмыс істегенмен, ұзақ уақыт көріспей қалатын кездер жиі болады», - дейді кейіпкеріміз.
Сейілбек Рахметов, №11 өрт сөндіру бөлімі бастығының орынбасары:
- 2022 жылы мына Қостанай облысында алапат өрт болып, ағаштар, орман жанған кезде біз бір аптадай сол жақта болдық. Сонда жұмыс істеп, өрт сөндіріп. Әйелім бәрі осында қалды. Бала-шағам бәрі осында қалды.
Төтенше құтқару операцияларына кеткенде кім болса да отбасын, жақындарын іздейтіні рас. «Сондай кезде қолдау қажет», — дейді Нұргүл ханым.
Нұргүл Жеңісқызы, №11 өрт сөндіру бөлімі есепшісі:
- Жолдасымыз іссапарға кеткенде отбасымызбен бірге сәттілік тілейміз. Қолдаймыз. Балаларымызбен бірге қосылып видеоқоңырау шаламыз. Бәріміз мәз болып аман-есен үйге келуін тілейміз.
Бір салада еңбек еткендіктен бір-бірімізді жақсы түсінеміз. «Сондықтан қызметтегі қиын күндерде үнемі қолдап, көмек беруге тырысамыз», - дейді олар. Рахметовтар отбасындағы бақыттың кілті осы.
Авторлары: Серік Селеубайұлы, Мерей Талап
