Білім саласында зейнеткерлік жасқа толған жұмыскерлермен еңбек шартын бұзуды оқу жылының соңына дейін қалдыру қажеттілігі жиі туындайды, себебі педагогтың ауысуы білім алушылардың оқуына кері әсерін тигізетіні анық, деп жазады Egemen.kz.
Осыған байланысты Салалық келісімге 9.4-тармақ енгізілген, оған сәйкес зейнеткерлік жасқа толған педагогпен еңбек шарты аталған негіз бойынша оның қалауымен оқу жылы аяқталғаннан кейін ғана бұзылады. Мұндай жағдайларда қолданыстағы еңбек шартына қосымша келісім ресімдеудің қажеттілігі жоқ.
Соған қарамастан зейнет жасына жеткен педагогтарды оқу жылы аяқталмай жатып жұмыстан босату жағдайлары әлі де кездеседі. Осындай жайт Жамбыл облысы Жуалы ауданында болды. Кәсіподақтың араласуынан кейін педагог жұмысқа қайта орналастырылды. Жуалы аудандық сотының биылғы жылдың 12 мамырдағы шешімі мен ұжымдық шарт нормаларын сақтау мәселесі бойынша директорға қатысты шығарылған жеке ұйғарым Салалық кәсіподақтың ресми сайтында жарияланды. Жамбыл облысы Жуалы аудандық соты азаматтық істі қарады. Сотқа талап қоюшы жағындағы үшінші тарап ретінде «Жамбыл облысы оқу-ағарту, ғылым және жоғары білім қызметкерлерінің жергілікті кәсіптік одағы» қоғамдық бірлестігі педагогтің құқығын қорғады. Талап қоюшы:
- «№4-ші Құрманбек Сағындықов атындағы орта мектебі» коммуналдық мемлекеттік мекемесінің 2024 жылғы 31 желтоқсандағы №264 бұйрығын заңсыз деп танып, бұзу туралы.
- Осы коммуналдық мемлекеттік мекемесінің 2025 жылғы 27 қаңтардағы №30 санды «№264 бұйрығына толықтырулар енгізу туралы» бұйрығын заңсыз деп танып, бұзу туралы.
- Жұмысына қайта орналастырып, мәжбүрлі түрде бос жүрген уақыты үшін орташа жалақыны өндіру туралы.
- Моральдық зиян сомасын өндіру туралы талап арызын түсірді.
Жуалы аудандық соты талап қоюшының талаптарын ішінара қанағаттандырып, тарих пәнінің мұғалімі қызметіне қайта оралды.
Талап қоюшының пайдасына 2024 жылдың 31 желтоқсанынан 2025 жылғы 12 мамыр аралығындағы мәжбүрлі түрде бос жүрген уақыты үшін орташа жалақысы яғни 2 100 328 (екі миллион бір жүз мың үш жүз жиырма сегіз) теңге сомасы өндірілді.
