фото: akorda.kz
Президент «Бейбітшілік пен құқыққа негізделген болашақ» атты конституциялық сот төрелігінің халықаралық форумына қатысушылармен кездесті, деп хабарлайды 24kz.
Кездесуде Қасым-Жомарт Тоқаев еліміз басқа мемлекеттердің озық конституциялық саясатымен бірге Венеция комиссиясының шешуші рөлін және оның үлгілі заң тәжірибесін бағалайтынын жеткізді. Бұл – демократия институттарының дамуын айқындау және адам құқығына кепілдік беру ісіндегі басты бағдарымыз. Мемлекет басшысы меймандарға қолға алынған ауқымды саяси, экономикалық және конституциялық реформалар жайында айтты.
Қайта жаңғырған Конституциялық сот әділ сот төрелігіне кеңінен жол ашты. Президенттің сөзінше, Қазақстанда «Заң және тәртіп» қағидаты іске асырылып жатыр. Құқықбұзушылыққа қатысты жаза мен жауапкершілікті қатаңдатумен қатар халықтың құқықтық мәдениеті біртіндеп артып келеді. Сондай-ақ Қасым-Жомарт Тоқаев Парламент жүйесінде алдағы уақытта болатын өзгерістерге тоқталды.
«Қазір Парламенттік республикаға айналу мәселесі күн тәртібінде тұрған жоқ», — деді Мемлекет басшысы. Оның сөзінше, «Күшті Президент – ықпалды Парламент – есеп беретін Үкімет» қағидаты сақталады. Жалпыұлттық референдум өткізу туралы ұсыныс бұл тұжырымдаманың өміршеңдігін көрсетеді. «Еліміздің болашағына қатысты шешімдерді бірлесіп қабылдау қажет», - деді Президент.
