Әлем чемпионатының 10 қыркүйек күні өткен ширек финалдық жекпе-жектерінде 13 боксшымыз өнер көрсетті.
Англияның Ливерпуль қаласындағы әлем чемпионатының ширек финалында өнер көрсеткен 13 боксшымыздың 6-ы жартылай финалға жолдама алды деп, хабарлайды Caravan.kz медиа порталы.
Ширек финалда 5 боксшымыз өзбекстандық қарсыластарымен кездесті. Қос елдің жанкүйерлері үшін де тартысты болған жекпе-жектерге тоқталсақ.
Күндізгі сессия
Күндізгі сессияда 6 қазақ боксшысы шаршы алаңға шықты. 4 боксшымыз жеңіске жетіп, жартылай финалға жолдама алса, ерлер құрамасындағы қос былғары қолғап шебері өзбекстандық қарсыластарынан жеңіліп қалды.
Виктория Графеева (60кг) 1/4 финалда Өзбекстан елінің боксшысы Ситора Турдибековамен қолғап түйістіріп, 4:1 есебімен жеңіске жетті.
Күндізгі сессияда екінші болып өнер көрсеткен
Елдана Тәліпова ширек финалда жаңа зеландиялық Элин Даниэль Ли-Лоны айқын басымдықпен жеңді. Осылайша, Елдана Тәліпова (80 келіден жоғары) әлем чемпионатының жартылай финалына өтті.
55 келіге дейінгі салмақта өнер көрсеткен Махмұд Сабырхан ширек финалда жапониялық Руй Ямагучимен қолғап түйістірді. Отандасымыз алғашқы раундтан-ақ басымдық танытып, қарсыласын нокдаунға жіберді. Нәтижесінде төрешілердің шешімі бойынша айқын басымдықпен жеңіске жетті.
Алғаш рет ересектер арасындағы әлем чемпионатына қатысқан Төрехан Сабырхан да жартылай финалға жолдама алды. Ол ширек финалда франциялық Макан Траорені айқын басымдықпен жеңді. Осылайша, Төрехан Сабырхан (70 келіге дейін) алғаш рет ересектер арасындағы әлем чемпионатының жүлдегері атанды.
Олимпиада жүлдегері, 2023 жылғы әлем чемпионы Нұрбек Оралбай Ливерпульдегі әлем чемпионатын жүлдесіз аяқтады. Ол 1/4 финалда Өзбекстан боксшысы Жавохир Уматалиевтен жеңіліп қалды.
Сағындық Тоғамбай да жартылай финалға шыға алмады. Отандасымыз 90 келіге дейінгі салмақтың ширек финалында өзбекстандық Турабек Хабибуллаевпен қолғап түйістірді.
Өзбек боксшысы алғашқы раундтан-ақ басымдық танытты. Нәтижесінде төрешілердің шешімі бойынша Турабек Хабибуллаев (Өзбекстан) жеңді.
Кешкі сессия
Кешкі сессияда 7 боксшымыз өнер көрсетіп, оның 3-і ғана жартылай финалға өтті.
51 келіге дейінгі салмақта сынға түскен Алуа Балқыбекова 1/4 финалда И-Сюань Гуомен (Тайбэй) жұдырықтасты. Отандасымыз алғашқы раундтан-ақ тізгінді қолына алды. Нәтижесінде айқын басымдықпен жеңіске жетті.
Карина Ибрагимова 57 келіге дейінгі салмақтың 1/4 финалында Париж-2024 Олимпиадысының күміс жүлдегері Юлия Шереметамен (Польша) кездесті. Бұрымды боксшымыз алғашқы раундта басым түсті. Дегенмен польшалық боксшы екінші және үшінші үшминуттықта тізгінді қолына алып, жеңіске жетті.
Ал Аида Әбікеева ширек финалда үш дүркін әлем және 2020 жылғы Олимпиада чемпионы түркиялық Бусеназ Сюрменелимен жұдырықтасып, сенсациялық жеңісіне қол жеткізді. Отандасымыз алғашқы раундтан-ақ қарсыласын тығырыққа тіреді. Нәтижесінде төрешілердің шешімі бойынша 5:0 есебімен жеңіске жетті.
80 келіге дейінгі салмақта өнер көрсеткен Гүлсая Ержан ширек финалда Аустралия елінің өкілі Есета Флинтпен кездесті. Жекпе-жектің қорытындысы бойынша аустралиялық боксшы төрешілердің шешімімен жеңіске жетті.
Бейбарыс Жексен (60кг) ширек финалда Париж-2024 Олимпиадасының жеңімпазы Абдумалик Халоковпен (Өзбекстан) қолғап түйістірді. Жекпе-жектің қорытындысы бойынша төрешілердің бірауызды шешімімен Абдумалик Халоков (Өзбекстан) жеңіске жетті.
65 келіге дейінгі салмақта өнер көрсеткен Ертуған Зейнуллинов Асадхуджа Муйдинхужаевпен (Өзбекстан) кездесті. Жекпе-жек қорытындысы бойынша Париж-2024 Олимпиадасының чемпионы Асадхуджа Муйдинхужаев төрешілердің шешімімен жеңіске жетті.
Бокстан Қазақстан ерлер құрамасының капитаны Айбек Оралбай 90 келіден жоғары салмақта Хорватия елінің өкілі Лука Пратльячичпен өзара мықтыны анықтады. Үш раунд бойы хорватиялық қарсыласына еш мүмкіндік бермеген отандасымыз төрешілердің шешімімен жеңіске жетті. Осылайша, Айбек Оралбай (90 келіден жоғары) әлем чемпионатында кем дегенде қола медальға ие болды.
Айта кетейік, тағы екі боксшымыз әлі ширек финалда бақ сынайды. 12 қыркүйек күні Назым Қызайбай (48 кг) мен Санжар Ташкенбай (50 кг) рингке шығады.
Ұлыбританияның Ливерпуль қаласында өтіп жатқан ерсектер арасындағы әлем чемпионаты 14 қыркүйекке дейін жалғасады.
