Енді өңірдегі жағдайды білсек. Түркістан облысында жыл басынан бері 432 адам баспаналы болды.
Олар жылдар бойы үй кезегінде тұрғандар. Жыл соңына дейін тағы жүздеген адамға пәтер кілті тапсырылады. Жалпы өңірде 100 мыңнан астам адам баспана кезегінде тұр. Облыс құрылғалы 7 мыңдай отбасы коммуналдық баспанамен қамтылған.
Қала тұрғыны Динара Нығметова 2019 жылдан бері үй кезегінде тұр. Көпбалалы ана қазір 4 баласымен бірге жалдамалы пәтерде тұрып жатыр. Өзі үйде нан пісіреді. Жолдасы оны дүкендерге өткізеді. Бар арманы — кезек тезірек жылжып, өз үйіне қол жеткізу.
Динара Нығметова, көпбалалы ана:
- Бала-шағамыз өсіп келе жатыр. Кішкентай кезінде кезекке тұрғанбыз. Қазір студент. Өзіміздің үйіміз болса дейміз. Әр баланың өзінің бөлмесі болса, емін-еркін жүргенге жақсы ғой. Пәтерде тұрғаннан кейін біреудің үйін жөндегін келмейді ғой. Өзіңнің үйін болса істейсін. Кезек тездетіп жылжып, үйлі болсақ деген үмітіміз бар.
Биыл Түркістан қаласында тұрғын үйге мұқтаж отбасыларға 944 пәтер беру жоспарланса, соның 432-сі тапсырылды. Жыл соңына дейін қалған 512 пәтерді үлестіру көзделуде.
Динара Жіпсібаева, қалалық Тұрғын үй қатынастары және тұрғын үй инспекциясы бөлімі басшысының орынбасары:
- Жалпы көпбалалы отбасыларға 3 бөлмелі пәтер тиесілі, әлсіз топтарға 2 бөлмелі пәтерлер берілетін болады. Бізде база бар, сол базада бұл кісі қазір 244-ші кезекте тұр. егер жоспарланған 512 пәтер беріліп жатса, соның ішіне кіруі мүмкін. Болмаса келесі жылдың ішінде алатын болады.
Түркістан облысында 100 мыңнан астам азамат тұрғын үйге мұқтаждар есебінде тұр. Облыс құрылған 7 жылда кезекте тұрған 8 мыңға жуық отбасы коммуналдық баспанамен қамтылған.
Сандуғаш Үсенова, облыстық Энергетика және ТҮКШ басқарамасы тұрғын үй бөлімінің бас маман:
- Биылғы жылы бізде 1600 жуық коммуналдық тұрғын үй беру жоспарланған. Оның бүгінгі күні 1021 берілді. Жыл соңына дейін 578 баспананы беру жоспарлануда. Сонымен қатар ипатекалық бағдарламалар арқылы биыл 2178 пәтерді беру күтілуде. Облыс аумағында жыл сайын 1 млн шаршы метр пайдалануға беріліп жатыр.
Десе де елімізде баспана мәселесі өзекті. 1 млн-ға жуық азамат кезегін күтіп жүр. Оның жартысына жуығы баспанаға мұқтаж отбасы.
Әсем Әлжанова, ҚР ӨҚМ Құрылыс және ТҮКШ істері комитетінің басқарма басшысы:
- Мемлекет тарабынан тұрғын үймен қамту мәселесін шешу үшін арендалық баспана, жалға алған үйді субсидиялау, жеңілдетілген ипотекалық несиелер мен тұрғын үй сертификатын беру қарастырылған. Өткен жылы 13 мыңнан аса тұрмысы төмен отбасыға жаңа пәтерлер жалға берілсе, ағымдағы жылы 6 мыңнан аса отбасы осындай баспанаға қол жеткізді.
Мамандардың айтуынша, биыл наурыз айынан бастап, тұрғын үйге кезекке тұру, оны тіркеу «Отбасы банкі» арқылы жүзеге асады. Ал қыркүйек айынан бастап жаңа жүйе арқылы әлеуметтік осал топтағыларға пәтерді жалға беру және жеңілдетілген ипотекалық несие беру басталады.
Жандос Жұмабек, Ерболат Әбіш, 24 KZ
