Депутат Нартай Аралбайұлы әлеуметтік қызметкерлердің жағдайы жанға бататынын айтып, олардың жалақысын көтеруді ұсынды, — деп хабарлайды Massaget.kz тілшісі .
Оның сөзінше, ерекше балалармен жұмыс істейтін, оларды емдейтін, жаттықтыратын, күн сайын жүздеген баланы арнайы мекемеде, кейбірін үйіне барып оқытатын мыңдаған маман бар.
"Олар әлеуметтік қызмет көрсету орталықтарында жұмыс істейді. Бірақ ерекше баланы қатарға қосу үшін жанын салатын қызметкерлерге ерекше жағдай жасап, жұмыскерлерді жоғары жалақы алатындардың қатарына қосу қиямет-қайым қазір. Өзім аяқтай барған Астана қаласындағы әлеуметтік қызмет көрсету орталығында 640 бала ем алады, оның 63-і — кәмелет жасына жеткендер. Ерекше балаларға ерекше жағдай жасауға тиіс орталықтағы 160 қызметкердің орташа жалақысы — 180 мың теңге. Жұмыс көбіне жоғары эмоционалды және физикалық күш-жігерді қажет ететінін ескерсек, бұл — өте аз ақша", — дейді ол.
Нартай Сәрсенғалиев осының салдарынан ешкім мұндай орталыққа қызметке келгісі келмейтінін, кадр тапшы екенін мәлімдеді.
"2024 жылы 53 қызметкер жұмыстан кетсе, 2025 жылы жартыжылдықта 28 қызметкер қызметтен кеткен. Жалақы көтерілмесе жағдай оңалмайды. Бұл бір ғана мысал, еліміздегі барлық әлеуметтік қызмет көрсету орталығындағы жағдай дәл осындай", — деді депутат.
Ол тағы бір әлеуметтік қызмет көрсету орталығына барғанын, жұмыскерлердің жағдайы адам аярлықтай екенін жеткізді.
"Бір орталыққа 900 ата-әже қаралады. ...Қам көңіл қариялардың жағдайын жасайтын әлеуметтік қызметкерлердің жалақысы — 110 мың теңге. Салдарынан ол жаққа ешкім жұмысқа бармайды", — деді ол.
Депутат мынадай ұсыныс жасады:
- Орта медицина қызметкерлерінің (ЕДШ нұсқаушысы, массажист — жалпы әлеуметтік қорғау жүйесі қызметкерлерінің) жалақысын көтеру;
- Әлеуметтік саладағы мамандарға 18 күнге дейін (барлығы 48 күн) қосымша демалыс енгізу;
- Әлеуметтік қызметкерлер үшін төмен мөлшерлемемен, бастапқы жарнасы төмен жеңілдетілген ипотекалық бағдарламаларды енгізу; т.с.с.
Қызықты жаңалықтар мен видеоларды көру үшін TikTok арнамызға жазылыңыз!
