Атырауда вагон құрастыратын зауыт пен теміржол саласына өндірістік қызмет көрсететін кешеннің алғашқы желісі іске қосылды, деп хабарлайды 24kz.

Жаңа кәсіпорын жылына 10 мың қос дөңгелек шығаруға қауқарлы. Мамыр айында іске қосылған шеберхана 3 айда 700 дөңгелекті жөндеуден өткізді. Өңірде жалпыұлттық пул шеңберінде құны 108 миллиард теңгені құрайтын 22 жобаны жүзеге асыру жоспарланса, оның алтауы жұмысын бастады.

Жөндеу шеберханасында тәулік бойы қарбалас. Себебі, ақаусыз вагон дөңгелегі – теміржол бойындағы қозғалыс қауіпсіздігінің басты кепілі. Мұнда тозығы жеткен вагон дөңгелектері жөнделіп, қайта құрастырылып, тұтынушыға жөнелтіледі. Шеберханада темір жонушы, дәнекерлеуші, дөңгелек құрастырушы секілді 80-ге тарта маман еңбек етуде.

Ерсұлтан Анарбекұлы, шеберхана инженері:

- Бізге келген дөңгелек жұптарын алдымен қараймыз, параметрлерінің сәйкестігін және соған байланысты біз жөндеу түрін анықтаймыз. Және оське сәйкес дөңгелектің ішкі диаметрін жонамыз. Бұл жерде аса дәлдік керек. Нақтылық керек. Себебі, біздің токарьлар 10 микрон мен 25 микрон арасындағы дәлдікті ұстау керек.

Арыстанбек Кенже, тілші:

- Әзірге шеберхана күніне осындай 18 жұп вагон дөңгелегін шығарады. «Ал толық қуатына жеткенде өндірісте өнімді 28-ге дейін жеткізуге болады», — дейді мамандар. Себебі, батыс өңірде вагон деңгелектерін жөндеуге деген сұраныс күн санап артып келеді.

Биыл мамыр айында іске қосылған шеберханада 700 жұп вагон дөңгелегі жөнделді. Атырау вагон құрастыру зауыты мен «Махамбет» өнеркәсіптік-өндірістік кешені өңірдегі ауыр машина жасау индустриялық жобасының бір бөлігі. Жоба теміржол саласының импортқа тәуелділігін 96%-ке дейін азайтуға бағытталған.

Олег Новиков, кәсіпорын директоры:

- Негізгі мақсат – теміржол вагондарының дөңгелектерін күрделі жөндеуден өткізу және кешенді сервистік қызмет көрсету. Қазір біз батыс өңірдің қажетін өтеудеміз. Сондай-ақ Қазақстан бойынша 7 компаниямен келісімшарт жасастық. Біздің өндірістік қуатымыз ТМД елдерінен де тапсырыс алуға жетеді.

Осылайша, Атырауда теміржол саласына кешенді қызмет көрсететін ірі жоба жүзеге асты. Келешекте мұнайлы өңір еліміздің ірі өнеркәсіптік орталығына айналмақ. Жалпыұлттық пул аясында өңірде құны 108 млрд теңге болатын 22 жоба жүзеге асуы тиіс еді. Қазір 6 жоба жүзеге асты. Жыл аяғына дейін тағы 16 жоба пайдалануға берілуі тиіс. Жобалар толық аяқталғанда 1500 жұмыс орны ашылады деп күтілуде.

Авторлары: Арыстанбек Кенже, Айбек Байзақов, Жандос Рахметуллин