Таразда ескі мектептер заманауи үлгіде қайта жаңғырып, жайлы оқу ордалары бой көтеріп жатыр. Үш ауысымды мектептер мәселесі де шешілген .
Мемлекет басшысы Қасым-Жомарт Тоқаев “Әділетті мемлекет. Біртұтас ұлт. Берекелі қоғам” атты халыққа арнаған жолдауында:
"Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс. Сол үшін "Жайлы мектеп" ұлттық жобасы қолға алынды. Біз 2025 жылға дейін 800 мың баланың заманауи мектепте оқуына жағдай жасаймыз. Осылайша, апатты жағдайдағы және үш ауысыммен оқитын мектеп мәселесін толық шешеміз. Бұл ауыл және қала мектептерінің айырмашылығын едәуір азайтады.
Жалпы, мектеп салу үкімет және әкімдіктер үшін басты міндеттің бірі болуы керек", — деген болатын.
Оқу-ағартуға деген оң көзқарастың арқасында Тараздың білім саласы да толайым табыстарға кенелуде. Бүгінде қаламызда 294 білім мекемесі жұмыс істейді. Оның 141-і мемлекеттік, 153-і жекеменшік мекемелер мен ұйымдар.
Өткен оқу жылы барысында қала шекарасының өзгеруіне байланысты Байзақ, Жамбыл аудандарынан 37 мекеме қосылса, жаңа құрылыс есебінен 5 мектептің құрылысы аяқталып, 5 180 оқушы орны ашылды. Оның ішінде 3 білім ордасы "Жайлы мектеп" ұлттық жобасы аясында салынғанын айрықша атап өтейік.
Нақтырақ тоқталсақ, 45 мыңнан астам тұрғыны бар "Ұлы дала" шағын ауданында 2000 және 1200 орындық, "Бәйтерек" шағын ауданында 1200 орындық жайлы мектептер бой көтерді. Сонымен қатар "Казарма" алқабында 180, "Арай" алқабында 600 орынды оқу ошақтары есігін ашты. Осындай жүйелі жұмыстардың нәтижесінде шаһардағы оқу ошақтарының саны 42 бірлікке артты.
Жаңа мектептердің ашылуының арқасында "Бәйтерек" шағынауданында орналасқан №3 мектеп-лицейдегі үш ауысымдылық мәселесі шешімін тауып отыр. Сондай-ақ алдағы қазан айының басында "Шөлдала" алқабындағы 600 балаға арналған тағы бір жайлы мектеп алғашқы шәкірттерін қабылдайды. Осының есебінен №55 орта мектептегі орын тапшылығы жойылады. Бұл да – ел президенті жүктеген міндеттің жүйелі жүзеге асуының бір көрінісі.
Көне шаһарда жаңа мектептер салумен қатар, білім ордаларын күрделі жөндеуден өткізуге де айрықша мән берілуде. Себебі жайлы оқу ортасы — сапалы білімнің негізі. Осыған орай №7, 15, 27 орта мектептерде жапсарлас жаңа ғимарат құрылысының жүргізілуі нәтижесінде оқушылардың сапалы білім алуына толыққанды жағдай жасалады.
Бұған қоса №1, 13, 25, 45 және 54 оқу ордаларында күрделі жөндеу жұмыстары жүруде. Қазіргі таңда №1, 45 және 25 оқу ошақтарындағы жөндеу жұмыстары аяқталды. Заманауи үлгіде жабдықталған білім ордалары Білім күнінде оқушыларға есігін ашпақ.
Өзге де оқу ордаларындағы құрылыс қарқынды жүруде. Жобаға сәйкес жөндеу жұмыстары аясында мектептердің инженерлік жүйелерді жаңғырту, (жылу жүйесі, су құбыры ішінара, кәріс жүйесі, сантехника), сәулет-құрылыс бөлігі Б,В,Д блоктарындағы сыртқы қабырғаларды жақтауға дейін бөлшектеп қайта құру, қабырғаларды жылылау және қасбетін ауыстыру қарастырылған.
Білім ордаларындағы құрылыс жұмыстары Тараз қаласының әкімі Бақытжан Орынбековтің тікелей назарында. Жуырда шаһар басшысы күрделі жөндеу жұмыстары жүріп жатқан және құрылысы аяқталған мектептерді аралап, жұмыс сапасы мен оқу жылына дайындығымен танысқан болатын. Әр оқу ошағындағы күрделі жөндеу жұмыстарының барысына назар аударған қала әкімі жауапты тұлғаларға құрылысты межеленген мерзімінде және сапалы аяқтау бойынша нақты тапсырмалар жүктеді.
Шаһар аумағында оқу ордаларын жаңғырту жұмыстары тек мұнымен шектелмейді. Атап айтсақ, Жамбыл облысы әкімдігі білім басқармасы тарапынан тиісті қаржы бөлініп, жобалық-сметалық құжаттамалары дайын №3, 8, 10, 11, 18, 22, 23, 30, 32, 38, 42, 43, 60, Шайқорық, В.Чкалов, Б.Бесбаев, Әйтиев, Гоголь орта мектептерін ағымдағы жөндеуден өткізу бойынша мемлекеттік сатып алу конкурсына жолданған.
Білім саласы жетекші сала ретінде әрдайым зор маңызға ие. Бұл тұрғыда атқарылар жұмыстар бұдан да ауқымды, алдағы жоба-жоспарлар жұмыр. Сондықтан Тараздың білім саласы келешекте де дамудың даңғыл жолынан адаспайтынына сенім мол.
Мәтіннен қате тапсаңыз, бізге жазыңыз
