Алматыда туристер мінген пойыз сапарын бастады. 130-дан астам саяхатшы «Keruen express» туристік пойызымен еліміздегі және Өзбекстандағы тарихи орындарды аралайды. Сапар 6 күнге жоспарланған. Саяхатшыларды білікті мамандар мен арнайы гидтер ертіп жүреді.
6 күндік сапар «Алматы 2» теміржол вокзалынан басталды. Туристер үшін флешмоб ұйымдастырылып, ұлттық дастарханнан дәм ұсынылды. Саяхатшылар арасында Алматы қаласындағы «Қиын өмірлік жағдайдағы балаларды қолдау орталығының» 25 тәрбиеленушісі де бар.
Ал астаналық Айтжамал Исманова бұл туристік бағыт жайлы әлеуметтік желіден көрген. Сөйтіп құрбыларымен бірге саяхаттауға бел буыпты. Себебі Түркістан, Самарқанд, Бұхара, Ташкент сынды қалалардың тарихы оны әрдайым қызықтырды.
Айтжамал Исманова, турист:
Қазақтың бір Мекке-Мәдинасы – Түркістан. Біз ол жаққа екі жыл бұрын барғанбыз. Ал бұл жолы Өзбекстанның ежелгі қалалары – Бұқара, Самарқанд, Ташкентті көріп, тарихи әңгімелер мен аңыздар тыңдап, рухани байлығымызды арттырып қайтайық деген оймен жолға шықтық.
Туристік пойыз 5 вагоннан тұрады. Төртеуі купе болса, біреуінде мейрамхана орналасқан. Барлық вагон былтыр Қазақстанда жасалған. Мұнда туристер үшін қажеттінің бәрі бар. Ал көрпе-төсегі ұлттық нақышта тігілген.
Руслан Жалғасбай, «Жолаушылар тасымалы» АҚ «Оңтүстік» жолаушылар тасымалы жөніндегі аймақтық филиалының директоры:
Қытай туристерімен бірлесіп, Алматы, Тараз, Түркістан және Өзбекстан қалаларын көрсетуді жоспарлап отырмыз. Тәжікстан Республикасымен де келісімдер жасалып жатыр. Екі жақта да туризмді дамытуға басымдық берілуде.
«Қазақстан темір жолы» ұлттық компаниясы Швейцариялық пойыз жабдықтарын өндіретін кәсіпорынмен келісімге келді. Құжатта 2030 жылға дейін 550-ден астам вагон шығару көзделген. Сарапшылар бұл келісім ішкі туризмді дамытуға үлкен септігін тигізеді деп отыр.
Нұрдәулет Сыздық
