Оралдық тұрғынды алаяқтар алдап, бар жиған қаржысынан айырмақ болды, деп хабарлайды Skifnews.kz ақпарат порталы.
Олар бірнеше күн бойы ер адамға қоңырау шалып, өзін әртүрлі адамдар ретінде таныстырған. Алдымен бейтаныс әйел “Тамарамын” десе, артынша “қызы” мен “ұлы” болып сөйлескен.
Алаяқтар ер адамның депозиттегі ақшасы “қауіпте” екенін айтып, бар жинағын шешіп алып, 1,3 миллион теңгені “қауіпсіз шотқа” аударуға көндірген.
Ер адам ақшаны аудару үшін қаладағы сауда орталықтарының біріне барып, терминалдан деректерді енгізіп тұрған сәтінде полицейлер оны байқап қалған. Ол телефонмен сөйлесіп, қатты уайымдағаны көрініп тұрған.
Тәртіп сақшылары күмәнді жағдайға бірден араласып, ер адамға телефонның ар жағында алаяқтар отырғанын түсіндірді. Алайда өзін “жұбайы”, “қызы” және “ұлы” деп таныстырғандар азаматты ешкімді тыңдамауға, ақшаны аудара беруге үгіттеген.
“Полицейлер дер кезінде араласпағанда, ер адам бар қаржысынан айырылып қалар еді”, – деп хабарлады ІІМ баспасөз қызметі.
Қазір аталған дерек бойынша тергеу амалдары басталды.
