АҚШ әскерлері қауіпсіздік кепілдігі ретінде Украина жеріне кірмейді.
Бұл туралы Дональд Трамптың баспасөз хатшысы Кэролайн Лэвитт мәлімдеді. Дүйсенбі күнгі Зеленский мен Трамп кездесуінде америкалық қарулы күштердің Шығыс Еуропаға аттануы түбегейлі жоққа шығарылмай, бітімнен кейін Франция мен Ұлыбритания сарбаздары қатарына қосылуы мүмкін екендігі айтылған. Алайда Ақ үйдегі брифингте олардың Украина аумағына кірмейтіні белгілі болды. Оған қоса америкалық әуе күштері Киев кеңістігін күзетуі мүмкін. Десе де Вашингтон өзі ұсынатын қауіпсіздік кепілдігінің жай-жапсарын Зеленский мен Путиннің кездесуіне дейін ашып айтуға құлықсыз.
Кэролайн Лэвитт, АҚШ президентінің баспасөз хатшысы:
- АҚШ президенті Украина жеріне америкалық әскер кірмейтінін айқын жеткізді. Алайда біз ұйымдастыруда қолдау көрсетіп, еуропалық одақтастарымызға қауіпсіздік кепілдігін ұсынуға дайынбыз. Президенттің пайымдауынша, қауіпсіздік кепілдігі – ұзақ мерзімді бейбітшіліктің басты алғышарты. Сол себепті ол ұлттық қауіпсіздік мамандарына кәрі құрлықпен бірлесе жұмыс істеуді, сондай-ақ бұл мәселені Украина және Ресей тараптарымен жалғастыра талқылауды тапсырды.
