Украинадағы қарулы қақтығысты тоқтату, елге қауіпсіздік кепілдігінің берілуін АҚШ-қа мұхит асып барған еуропалық саясаткерлер де қолдады.
Аляскадағы саммиттен кейін Вашингтонда кездесу бес сағатқа жалғасты.
Трамп пен Зеленский кездесуі аяқталды. Кейіннен ол еуропалық саясаткерлермен көп жақты жиынға ұласып, Шығыс Еуропадағы соғысты тоқтатудың жолдары мен Украинаға берілер қауіпсіздік кепілдігі сөз болды. Ақ үй нақты бір келісімге қол қоюдың болмайтынын о бастан ескертіп, бітімге келудің тек келесі деңгейіне өтуді мақсат ететінін хабарлаған еді. Солай болды да. 5 сағатқа жуық жиналыстың қорытындысы бойынша Путин мен Зеленский жүздесіп, кейіннен қасына Трампты алып, үш жақты форматта жиын өткізетін болды. Қақтығыс басынан бері Мәскеу мен Киев ат кекілін кесісіп, бір-бірімен тікелей жүздеспей жүргеніне әлем куә. Шаттл дипломатиясынан жібіп, Дональд Трамп билікке келгелі ең болмағанда делегациялар үстел басына жиналған еді. Ал енді екі елдің президенттері бетпе-бет жолығып, соғысты аяқтау кешегі күнге қарағанда мүмкін болып отыр. Қырымнан бас тарту, НАТО-ға қосылмау, жер мен тұтқын алмасуға қатысты пікірлер БАҚ беттерінде жиі айтылса да, осы жиынның соңында ол жайлы ешкім ләм мим демеді. Жиынға қатысқан Германия канцлері Фридрих Мерц Зеленский мен Путин кездесуі алдағы екі аптада болуы керек десе де, нақты уақыты мен орны әзірге мәлім болмады.
