Түркістан облысында ауылдық елді мекендерде шахмат үйірмелерін көбейту мақсатында мектептер мен қосымша білім беру ұйымдарында үйірмелер желісі дамып келеді, деп хабарлайды Egemen.kz.
Қазіргі таңда облыс аумағында 11 «Шахмат үйі» бар. Сондай-ақ 20 спорттық мекемеде 97 жаттықтырушы 2475 спортшымен тұрақты жұмыс жүргізуде.
Бұл деректер облыс әкімінің орынбасары Ертай Алтаев пен Қазақстан Шахмат федерациясының вице-президенті Марат Есеновтің кездесуінде келтірілді. Өңірде шахматты дамыту, алдағы жоспарлар мен маңызды жобалар талқыланған кездесуде 2023-2027 жылдарға арналған «Жол картасы» бекітілгені, қала және аудандарда шахматшыларға қолайлы жағдай жасалғаны да айтылды.
Айта кетелік, биыл қарашада Түркістан қаласында жасөспірімдер арасындағы Қазақстан кубогының финалдық кезеңін өткізу жоспарланып отыр.
