Келесі жылы қаңтардан бастап 50-ден асқан ер адамдар медициналық скринингтен жылына екі рет өтеді. Бұл жүрек ауруларын ерте анықтауға көмек береді. Ресми деректерге сүйенсек, кейінгі жылдары инфаркт алып, ауыр дертке шалдыққандардың арасында ер адамдар көбейген. Мәселен, 2018 жылы осы дерттен көз жұмғандардың 55%-ы ерлер болса, қазір бұл көрсеткіш 70 пайызға жуықтаған. Ал скринингтің арқасында былтыр 120 мың адам дертін дер кезінде анықтаған. Тек Астанада әр ауруханада айына кемінде 300 науқас медициналық тексерістен өтеді. Нәтижесінде шамамен 30 адамның жүрек-қантамыр ауруына шалдыққаны белгілі болады.
Салтанат Бақбергенова, дәрігер:
Скринингті біз науқастарға хабарлаймыз немесе әлеуметтік желілер арқылы науқастардың барынша біліп-көруіне жағдай жасаймыз. Науқастар келе алмаған жағдайда немесе бас тартқан жағдайда қайта-қайта хабарласып келуіне барынша ықпал етеміз.
Жалпы, қазір елімізде 30 және 74 жас аралығындағы азаматтарға арналған скринингтік бағдарламалардың 8 түрі бар. Медициналық тексеріс жүрек ауруларымен қатар, обыр, қант диабетін ерте анықтап береді. Сондай-ақ биылдан бастап 18 жастан асқандар В және С гепатиттеріне тексерістен өте алады. Бұл цирроз дертінің алдын алу үшін керек. Айта кетсек, скринингтен кез келген уақытта өзіңіз тіркелген ауруханаға барып өте аласыз. Ол үшін жеке куәлігіңізді ала барсаңыз жеткілікті.
Жанел Өтеулі
