Жамбыл облысындағы балабақшаларда бүлдіршіндерді қабылдау онлайн жүргізіліп жатыр, деп хабарлайды 24kz.
Мұндай мүмкіндік ваучерлік қаржыландыру жүйесінің арқасында іске асуда. Жобаның артықшылығы, ата-ана үйден шықпай-ақ баласын балабақша кезегіне қоя алады. Тіпті бөлінген қаржыны қадағалайды. Былтыр Таразда басталған пилоттық жоба тиімділігін көрсетіп, енді жыл соңына дейін елдегі барлық балабақшаға енгізілмек.
Ваучерлік қаржыландыру жүйесі былтыр Таразда пилоттық режимде басталған. Жоба тиімділігін дәлелдеп, республика бойынша тағы 20 қала мен Түркістан және Жамбыл облыстарынан 7 аудан қосылды. Жалпы жаңа жүйе мектепке дейінгі мекемелерді мемлекеттік субсидиямен қаржыландыруға арналған. Бұрын мемлекеттік тапсырыс шеңберінде балабақшаларға қаржыны жергілікті атқарушы органдар тарататын еді. Ал енді ваучерлік қаржыландыру арқылы ата-ананың арнайы шотына аударылады.
Ләззат Әбілдақызы, облыстық білім басқармасы басшысының орынбасары:
- Бұл жүйенің тиімділігі, ата-аналардың осы кезектілікті күтпей тиімділігі, біріншіден. Екіншіден, жан басына шаққандағы қаржыландырудың ашықтығы. Үшіншіден, балалардың осы балабақшалардағы орынның ашық түрде бақылай алуы.
Тараз қаласындағы барлық 194 балабақшаға ваучерлік жүйеге енгізілген. Онда тәрбиеленетін 25 мыңнан аса балаға қаражат жаңа жүйемен төленіп жатыр. Жаңа жоба кезек мәселесін де шешуде. Жалпы аймақтағы 2-6 жас аралығындағы балалардың 96,1%-і балабақшаға барады.
Гүлфайруз Есенқұлқызы, қалалық білім бөлімінің әдіскері:
- Білім бөлімінің де, балабақшаның да қатынасы жоқ. Жалпы орын қалай босайды? Бала кетті, автоматты түрде босайды. Сол орынға бірден ваучер шығып тұрады. Ал енді бізде мамыр айында, күз айында балалар мектепке кеткеннен кейін жаңа орындар болады ғой. Ол кезде шілдені бірінен бастап жаңа орындар түсіп тұрады.
Жүйе ең алдымен ата-анаға ыңғайлы. Себебі баласын балабақшаға орналастыру үшін бұрынғыдай кезек күтіп, құжат тасып жүрмейді. Алдын ала таңдаған мектепке дейінгі ұйымға электронды түрде өтінім береді. Оған электронды жолдама беріледі. Орын болса, Indigo ақпараттық жүйесі арқылы онлайн келісімшартқа отырады.
Арайлым Жұмабек, қала тұрғыны:
- Туғаныннан бастап кезекке тұрдық қой баланы балабақшаға орналастыру үшін. ХҚКО-ға баратынбыз тіркелу үшін. Ол жүйенің барлығы қазір жойылған. Қазір үйде отырып өз қолымыздағы смартфонмен кезекке қоямыз. Өзіміз қалаған балабақшаға орын аламыз.
Жыл соңына дейін елдегі барлық балабақша ваучерлік қаржыландыруға қосылмақ. Жалпы бүгінде дербестендірілген жүйеге республика аумағындағы 4678 мектепке дейінгі ұйым қамтылып, 350 мыңнан астам ваучер берілді. Соның есебінен кезек қысқарып, бюджет қаражаты 7 млрд теңгеге үнемделген.
Авторлары: Мерей Бает, Елдар Байділдә
