Бұрынғы көлік вице-министрі Сәтжан Аблалиев ұсталғанын Көлік министрлігі де растады, — деп хабарлайды Massaget.kz тілшісі .
Tengrinews.kz-ке берген жауабында Көлік министрлігі Сәтжан Аблалиев көлік вице-министрі қызметінен босатылғанын мәлімдеді.
"Ведомство құқық қорғау органдарына жәрдемдеседі", — деп толықтырды министрлік өкілі.
2 тамызда көлік вице‑министрі ұсталды деген ақпарат тарады. Ол пара алды деген күдікке ілінгені айтылған болатын.
Артынша ҰҚК сыбайлас жемқорлыққа қарсы іс-қимыл қызметі көлік вице-министрі Сәтжан Аблалиев ұсталғанын растады.
"ҰҚК сыбайлас жемқорлыққа қарсы іс-қимыл қызметі пара алды деген күдікпен және сот санкциясымен көлік вице-министрін қамауға алды", — деп жазылған бұған дейінгі хабарламада.
ҰҚК көлік вице-министрі ұсталған сәттің видеосын да жариялады.
Сәтжан Аблалиев туралы не белгілі?
Сәтжан Аблалиев 1970 жылы Атырау облысында дүниеге келген. Алматы көлік-жол институты және Қазақ қатынас жолдары университетін тәмамдаған.
Ол 2023 жылғы қазаннан бері көлік вице-министрі қызметін атқарып келді. Бұған дейін Солтүстік Қазақстан облысы әкімінің орынбасары болды және Автомобиль жолдары комитетінде жұмыс істеген.
Қызықты жаңалықтар мен видеоларды көру үшін TikTok арнамызға жазылыңыз!
