Бүгін елдің түкпір түкпірінде тұрғындар сенбілікке шықты. «Таза бейсенбі» экологиялық акциясы аясында өзен-көлдердің жағалаулары, тарихи ескерткіштер аумағы мен көше бойлары күл қоқыстан тазартылды.
Алматыда «Таза бейсенбі» акциясы аясында қаладағы саябақтар мен өзен жағалауларын ретке келтірді. Нәтижесінде 30 тоннадан астам қоқыс жиналды. «AMANAT» партиясының қалалық филиалы акция басталғалы 50-ден астам шара ұйымдастырып, 3000-нан астам адам сенбілікке шыққан.
Тоғжан Есбергенова, №2 қалалық емхана директоры:
Әр сенбі-бейсенбі сайын біз «Таза Қазақстан» акциясын қолдап, тұрақты түрде сенбілікке шығып жүрміз. Дегенмен, қала тазалығы талапқа толық сай емес. Сол себепті барлық тұрғындарды осы бастаманы қолдауға, қоршаған ортаның тазалығына бірге атсалысуға шақырамын.
Павлодарлықтар бүгін Ертіс жағалауын күл қоқыстан тазартты. Жақында жағалаудағы сахна жаңартылып, субұрқақ пен спорттық тренажерлар орнатылды. Тереңкөл жастары көпшілік игілігіне айналған бұл аумақты әр бейсенбі сайын күл қоқыстан тазартады.
Рустам Бесенов, «АМАNАТ» партиясы аудандық филиалының «Жастар рухы» қанатының мүшесі:
Ертіс жағалауын тазарту бүгінде аса өзекті мәселе. Өйткені Тереңкөл ауданында жағалау аумағы жаңартылып, қайта жаңғыртылды. Жуырда оның ашылу салтанаты өтеді. Біз, белсенді жастар, осы іске өз үлесімізді қосуға дайынбыз.
Экологиялық мәдениетті қалыптастыруға Жетісу өңірі де өз үлестерін қосуда. Олар бүгін Ақсу ауданындағы демалыс орындары мен тарихи нысандарды қоқыс пен тұрмыстық қалдықтардан тазартты. Ал Батыс Қазақстан облысының жастары Абай Құнанбайұлының 180 жылдығына орай сенбілік ұйымдастырып, ұлы ақынның есімі берілген даңғыл бойын, сондай-ақ ойын алаңдарын тазартты.
Жұмагелді Досжанов, Орал қаласының тұрғыны:
Жастар келіп, айналаны тазалап, барлығын ретке келтіріп жатыр. Болашақ – сіздердің қолдарыңызда. Мың алғыс!
Ал Қызылордада жыл басынан бері 200 мыңға жуық ерікті 8 мың тоннадан астам қоқыс шығарған. Өңірдің климатына жерсінетін 2 мыңнан астам қарағаш пен терек көшеттері егілген.
Дамир Нұрмұхамет
