Шымкентте қала әкімінің орынбасары Руслан Берденовке жасалған қастандық туралы іс бойынша негізгі сот талқылауы басталды. Сотта айыпталушы өз нұсқасын айтты. Руслан Берденовтің өкілі Жеңіс Тыныбек осы мәлімдемеге қатысты пікір білдірді, — деп хабарлайды Massaget.kz тілшісі.
Оның айтуынша, мұндай айыптаулар моральдық тұрғыдан да орынсыз.
"Ақылға сыймайды. Қорғаныс нұсқасы басынан-ақ моральдық және заңды тұрғыда мүмкін болмады. Адами тұрғыдан алғанда, кімде-кім мұндай ұстанымда болуы ұят", — деді жәбірленушінің өкілі.
Ол Руслан Берденовпен осы күдіктер бойынша жеке сөйлескенін айтты.
"Ол бұл әйелді білмейтінін айтты. Ойлап қараңыз: төрт баланың әкесі біреудің жұбайына қалай бірдеңе жазады? Берденовті жеке білгендіктен, (айыпталуышының — еск) мұндай ұстанымына таңғалдым", — деді Тыныбек.
Жәбірленушінің өкілінің айтуынша, Жиембайдың іс-әрекеті керісінше қылмысқа жоспарлы дайындық болғанын көрсетеді. Ол бұған дейін айыпталушының өзі қызғанышқа негізделген себеп туралы айтқанын, бірақ оның кейінгі айғақтары белгіленген дәлелдерге қайшы келетінін мәлімдеді
Айта кетейік, міндетті түрде келуі қажет екеніне қарамастан, Руслан Берденов сотқа келген жоқ. Сот отырысы кезінде оның өкілі жәбірленуші емделіп жатқанын мәлімдеді. Сот мемлекеттік тілде ашық режимде өтіп жатыр.
Берденовке жасалған шабуыл
Еске салайық, 21 сәуірде Шымкент қаласы әкімдігі ғимараты маңында атыс болды. Салдарынан Руслан Берденов жарақат алды.
Кейінірек күдікті ұсталып, уақытша ұстау изоляторына қамалды, бұл дерек бойынша қылмыстық іс қозғалды.
Мамырда Шымкент әкімінің орынбасары Руслан Берденов шабуылдан кейін алғаш рет мәлімдеме жасады.
Берденов туралы не белгілі?
Ол 1985 жылы 6 наурызда Шымкент қаласында дүниеге келген. 2006 жылы менеджмент мамандығы бойынша әл-Фараби атындағы Қазақ ұлттық университетін бітірген. 2009 жылы КИМЭП университетін Іскерлік басқару магистрі (MBA) дәрежесімен бітірді.
- Еңбек жолын 2005 жылы "Алматы құс" ААҚ ("Сеймар" тобы) компаниясының бөлшек сауда директоры қызметінен бастады.
- 2007 жылғы ақпан — 2010 жылғы шілде — Procter & Gamble компаниясының бас логистикалық үйлестірушісі.
- 2010 жылғы шілде — 2012 жылғы қараша — Eastcomtrans ЖШС жылжымалы құрамды жалдау бөлімінің бастығы.
- 2012 жылғы қараша — 2018 жылғы мамыр — "Ақ ниет" ЖШС бас директоры.
- 2018 жылғы қараша — 2019 жылғы сәуір — "Ақ ниет" ЖШС байқау кеңесінің мүшесі.
- 2019 жылғы сәуір — 2023 жылғы наурыз — Aq niet Group байқау кеңесі төрағасының орынбасары.
- 2023 жылғы 29 наурыздан бастап Respublica партиясының партиялық тізімі бойынша VIII сайланған Қазақстан Республикасы Парламенті Мәжілісінің депутаты, Қаржы және бюджет комитетінің мүшесі.
- Биыл Шымкент қаласы әкімінің орынбасары болып тағайындалды.
Instagram парақшамызға жазылып, ең қызықты ақпараттарды бірінші болып оқыңыз!
