Көкшетаудағы орталық саябақ жөнделіп жатыр , деп хабарлайды 24kz.
Жаңарту жұмыстары соңғы 30 жылда алғаш рет қолға алынды. Бұған қоса, қоғамдық орындар да ретке келтіріліп, жаңа аллея ашылады. Жалпы қаланы абаттандыру жұмыстарына қазынадан 4 млрд теңге бөлінді.
Абзал Азаматұлы, тілші:
- Шаһар халқының саны өскен сайын тұрғындардың демалып, серуендейтін жерлерінің маңызы еселеп артады. Қазір облыс орталығында бұл бағытта ауқымды жұмыстар жүргізілуде. Атап айтсақ, «Тәуелсіздік» алаңы мен орталық саябақ және Данқ алеясы күрделі жөндеуден өтіп жатыр. Нәтижесінде субұрқақтар қалпына келтіріліп, жаяу жүргіншілерге арналған тас төсеніштер толықтай жаңартылмақ.
Жөндеу жұмыстары 7 гектардан астам аумақта жүргізіліп жатыр. Нәтижесінде «Мәңгілік алау» мемориалды кешені мен жаңа жағалау арасында жасыл дәліз пайда болады. Онда тұрғындардың серуендеп, демалуына барлық жағдай жасалады.
Нұрсаят Қажыкенов, құрылыс учаскесінің басшысы:
- Қазір құрылыс алаңында 15 техника мен 40-қа жуық адам жұмылдылған. Барлығы кестеге сай жүргізіліп жатыр. Қазір біз инженерлік және жарықтандыру жұмыстарын аяқтауға жақынбыз. Сондай-ақ қоғамдық тәртіпті қадағалау мақсатында камераларда орнатамыз.
Бұл жұмыстар шағын шаһардың шырайын ашып, сәулетін арттырады,-дейді жауаптылар. Жөндеу жұмыстары тамыз айының соңында аяқталады.
Ерболат Серікбаев, қалалық ТКШ бөлімінің басшысы:
- Жаяу жүргіншілер жолдарын кеңейту, ұлғайту сияқты жұмыстар. Жаңа тас төсеніш төсеу. Жаңа архитектуралық формаларды орнату. Соның ішінде жаңа жарықтандыру шамдарын орнату жұмыстары. Балалар ойын алаңдары. Воркаут спорт алаңдары. Сонымен қатар субұрқақтарды орнату жұмыстары жүргізілуде.
Бұдан бөлек, облыс орталығында 3 мыңға жуық гүл мен 77 мың түп көшет егіледі деп көзделіп отыр. Сондай-ақ қала сәулетінің сәнін кетіріп тұрған 149 ескі үй сүріледі.
Авторлары: Абзал Азаматұлы, Виктор Полянный
