primeminister.kz

Шығыстан батысқа қарай Талғардан бастап Қаскелеңге дейін Алматы тау кластерін дамыту жоспарланып отыр, деп хабарлайды 24KZ. Табиғат тартуын талдасақ, 700 шақырымға дейін тау шаңғысы трассасын салуға мүмкіндік бар. Инфрақұрылымды салу кезінде экологиялық талап қатаң сақталып, қоршаған ортаға еш зияны тимейді. Керісінше, адам мен табиғаттың үйлесімін іске асыруға үлкен жауапкершілік алынған. Бүгін Үкімет басшысы Алматыға барып, туризм бойынша жиын өткізді.

Алматының таулары көздің жауын алып, бірден өзіне баурайды. Мұндай тұмса табиғат тұмшаланбауы тиіс. Тау кластерін түлету үшін Премьер-министр тікұшаққа мінді. Саланың келешегі жайында кеңес өткізді.

Ерболат Досаев, Алматы қаласының әкімі:

- Алматы тау кластерінің орталық аумағын дамытудың барлық 3 фазасы тұрақты тау шаңғысы инфрақұрылымын қалыптастыруға мүмкіндік береді. Нәтижесінде туристік аймақтарды өзара байланыстырып, территориялардың теңдей дамуына ықпал етеді. Сосын, әлбетте, экономикалық әлеуеті де еселенеді. Яғни жаңа жұмыс орындары, сапалы қызмет түрлері артады.

Тау кластеріне нұсқаушы, гид, ресторатор, қауіпсіздік, логистика және цифрлық мониторинг мамандары қажет. Бұл 12 мыңға дейін жаңа жұмыс орны. Тағы 5 мыңдай маусымдық жұмыстар бар. Сол маңайдағы жастар қалаға ағылмай, бюджет те салықтан қағылмай, қарық болғалы тұр. Айтпақшы, шикізаты жоқ елдер табиғатын тамашалатып, табыс тауып отыр. Сондықтан таулар мұнайды да алмастыра алады. Мұны сарапшылар: «Биік шыңдағы экономика», – дейді.

Синиша Топалович, америкалық Horwath HTL компаниясының серіктесі:

- Алматыны жыл бойына жұмыс істейтін әлемдегі жетекші курорттармен салыстыруға болады. Тау туризмі бағытына айналу мүмкіндігі мол. Стратегиялық мақсат – табиғат, бос уақыт, спорт пен мәдениетті біріктіретін Almaty Mountains Destination бірегей туристік брендін қалыптастыру. Басым бағыттардың бірі – көрнекті туристік нысандар құру, аспалы жолдар жүйесін, қонақ үй және спорт инфрақұрылымын дамыту.

Бұл жасыл инфрақұрылым болады. Ұлттық саябақтарға, жалпы жан-жағына зиян келтірмейді. Ерекше қорғалатын табиғи аймақтар мәртебесі де өзгермейді. Ал қозғалыс электр автобусына ауыстырылады. Австрия мен Норвегия сияқты үздік тәжірибелер үлгі етіледі.

Винсент Тассар, француздық STEM International компаниясының бас директоры:

- Шымбұлақ, Ой-Қарағай, Пионер, Қимасар және Бутаковкада қысқы туризммен қатар жазғы инфрақұрылымды дамытуға болады. Вело және жаяу жүргіншілер жолдарын қалыптастыру, белсенді демалыс орындары, глампинг, этно-қонақүйлер нысандарын салу және экологиялық таза көлікті іске қосуға баса назар аударылады. Орнықты даму стандарттары ескеріледі. Яғни жаңартылатын энергия көздері пайдалану, қоршаған ортаның цифрлық мониторингін енгізу көзделген.

Томас Тор Йенсен, Almaty Superski жобасының жетекшісі:

- Біздің компания тұрақты дамуға басымдық береді. Біз табиғат пен экологияны сақтаудың қаншалықты маңызды екенін түсінеміз. Сондықтан қазу жұмыстарын барынша азайтамыз, көтергіштер мен трассалар салу кезінде экожүйені бұзбай, табиғи ландшафтты сақтаймыз. Біз тау шаңғысы курорты балаларға, ересектер мен мүгедектігі бар жандарға қолжетімді болуы керек деп есептейміз. Барлық көтергіш барлық санаттағы адамдар пайдалана алатындай етіп жасалады.

Өзбекстан мен Қырғызстан да табиғатын тамашалатып, табыс табуға талпынып жатыр. Туристік нарықта қазығын қақпақшы. Ал бізде анағұрлым әлеует бола тұра, демалушылар Шымбұлақтан ғана шыға алмай жүр. Енді Түргеннен Қаскелеңге дейін 700 шақырымға созылған тау шаңғысы трассаларын салу көзделген. Сонда өткізу қабілеті тәулігіне 6 мыңнан 34 мың адамға дейін артады. Осылайша Алматы тау кластері 2029 жылға қарай Орталық Азиядағы жыл бойы жұмыс істейтін ең ірі туристік жобаға айналады деп жоспарланған.

Евгений Мұхамеджанов, Алматы қаласы қоғамдық кеңесінің және «ECOJER» қауымдастығының мүшесі:

- Бүгінде Алматы Қазақстандағы туризмнің негізгі бір нүктесіне айналды. Алматы агломерациясы ең көп туристерді жинайды. Бұл ыңғайлы және заманауи болуы үшін инфрақұрылымды дамыту маңызды. Бұл жай ғана мейрамхана немесе қонақүй салу емес, адамдарға жайлылық жасау деген идеяға негізделген. Тұрақты даму әлемінде бұл адамға бағытталған, яғни бизнес туралы емес, ең алдымен адамдарға жайлылық, адамдардың табиғатпен араласуына жағдай жасау.

Премьер-министр туристік артықшылығымызды атады. Оның сөзін әлемдік сарапшылар да қуаттайтынын айтты. Алматының таулары – жаһандағы ең үздік таулардың бірі.

Олжас Бектенов, ҚР Премьер-министрі:

- Мемлекет инфрақұрылымды: көлік инфрақұрылымын, жолдар, коммуникациялар, тау шаңғысы инфрақұрылымын салу бойынша шығындарды өз мойнына алады. Сонда дайын инфрақұрылымға бизнес пен инвестиция міндетті түрде келеді. Мамандардың айтуынша, тау инфрақұрылымына салынған 1 доллар курорттық инфрақұрылымға 2 доллар жеке инвестиция тартады. Бұл экономикамызды әртараптандыруға зор мүмкіндік. Аталған жоба Алматы қаласы мен Алматы облысының ғана емес, бүкіл еліміздің экономикалық ландшафтын түбегейлі өзгертеді.

Қазір де құрылысты жобалау жұмысы жүріп жатыр. Мамандар: «Істі инфрақұрылымы барынша дамыған Орталық аймақтан бастаған жөн», – дейді.

Олжас Бектенов, ҚР Премьер-министрі:

- Орталық аймақ өз кезегінде қазір жұмыс істеп тұрған Oi-Qaragai демалыс аймағынан бастап Пионер, Бутаковка, Қимасар шатқалы, Шымбұлақпен байланыстыруға мүмкіндік береді. Шымбұлақ дамудың екінші кезеңін бастайды. Біз бұл жұмысты мұздықтарға жақынырақ көтеріліп, батысқа қарай – Құмбел шыңы мен Көк Жайлау шатқалына дейін жеткіземіз. Бұл өте ауқымды жоба болмақ.

Туризм және саяхаттың әлемдік ЖІӨ-ге қосқан үлесі 10%-тен асады. Яғни 11 трлн доллардан асады. Тағы 300 млн-нан аса адамды жұмыспен қамтып отыр. Осы табыс пен пайдалы тізбекке енуге елдің де мүмкіндігі еселі.

Авторы: Нысаналы Ығыл