Отандық жеңіл өнеркәсіп өкілдері мемлекеттік жеңілдіктерді көре алмай отырғанын айтып шағынады. Мәселен, «ҚазСПО-N» ЖШС екі брендпен өнім шығарады: ZIBROO брендімен спорттық киімдер тігеді, «Alerma» сауда белгісімен қыстық күртешелерді нарыққа шығарады. Әрине, негізінен мемлекеттік тапсырыс орындайды. Компания өкілдерінің айтуынша, бірнеше қалада сауда желілері жұмыс істеп тұр. Әйткенмен, бәсекелестік өте жоғары. Саладағы көлеңкелі бизнес пен сапасы төмен импорттық арзан тауарлар нарықты «жаулап» алған.

Ахуал солай екен деп кәсіпорынның қол қусырып отырмасы тағы белгілі. Жұмысын жаңа бағытта ілгерілетіп жатыр. Спорттық киім өндірісіндегі елеулі еңбегінің арқасында жаңа деңгейге көтерілді. Компания отандық нарықта ғана емес, халықаралық деңгейде де бәсекеге қабілетті өнім өндіретін кәсіпорын ретінде танылып қалды. Бүгінде түрлі бағыттағы өнімдер шығарады. Жеңіл атлетика мен командалық спорт түрлеріне арналған формалар, күнделікті киюге қолайлы киімдер, спорттық аксессуарлар ұсынып отыр. Барлық өнім жоғары сапалы материалдардан тігіліп, отандық және шетелдік технологиялардың үйлесімімен дайындалады. «ҚазСПО-N» брендімен шығатын киімдер функционалдылығы әрі ыңғайлылығымен және эстетикалық дизайнымен ерекшеленеді.

«Жылына 30-40 мыңға дейін өнім шығарамыз. Спорттық киімдер ұлттық нақышта жасал­ғандықтан ішкі нарықта сатылады. Ал қаз мамығы салынып тігілетін қысқы күртешелердің 80%-ға жуығы экспортқа кетеді. Ресейлік тұтынушыларымыз­дың үлесі артып келеді. Онлайн-дүкендер арқылы сол жаққа жібереміз. Біздің күртешелердің ең басты артықшылығы оны кір жуғыш машинада жуа беруге болады», дейді «ҚазСПО-N» ЖШС бас директоры Елена Свечникова.

Компания өндірісте автомат­тандырылған тігін жабдықта­рын қолданады. Өндіріс цехтары Алматы мен Есік қаласында орна­ласқан. Онда экологиялық таза материалдарды пайдалануға, еңбек қауіпсіздігі мен әділ еңбекақыны қамтамасыз етуге үлкен мән береді. Сондықтан «ҚазСПО-N» елдегі көптеген спорт федерациясының, мектеп пен колледждердің ресми серіктесі. Сонымен қатар компания жекелеген спорт клубтарымен және жеке тапсырыс берушілермен де тығыз жұ­мыс істейді. Жыл сайын түрлі спорттық жарыстарға, марафондар мен универсиадаларға арнайы форма дайындап береді.

«ҚазСПО-N» тіккен арнайы киімдер мен формалар мемлекеттік ұйымдарға, мұнай-газ, құрылыс, медицина, әскери және өнеркәсіп салаларына да ар­налған. Жұмыс киімдері ISO стандарттарына, сондай-ақ Техникалық реттеу және метрология комитеті талабына сай өндіріледі. Пайдаланушы мен тапсырыс беруші тарапынан сапасы жақсы, берік, ыңғайлы деген пікірлер жиі айтылады. Сонымен қатар компания технология­лық маталар, жанбайтын, су өткіз­бейтін, антистатикалық және бас­қа да қорғаныс функциялары бар өнімдер ұсынады.

«Кәсіпорында матаның қат­тылығы мен қыл-қыбырының сапасын анық­тайтын жеке зертхана бар. Тігіншілерді осы жерде өзіміз оқытып, даярлаймыз. Оқу тегін, кейін бірден жұмысқа аламыз. Орташа жалақы шамамен 200 мың теңге көлемінде. Негізі, отандық жеңіл өнеркәсіптің әділетсіз бәсекеде жолы ауыр, та­бы­сы мардымсыз. Уәделі жеңіл­діктер Үкімет тарапынан болып жатса, жағдай жақсарып, жұ­мыс­шының еңбекақысы да артар еді», дейді Елена Свечникова.

Компания алдағы уақытта экспорт көлемін ұлғайтып, көрші елдерге, әсіресе Орталық Азия нарығына шығуды көздейді. Электронды сауда платформаларын дамыту мен арнайы мобильді қосымшаны іске қосу да – ауқымды жоспар санатында.