Биыл сәуірде Жамбыл облысындағы жанармай құю бекеттерінің бірінде мотоцикл жүргізушісі пышақ жарақатын алды. Сот осы іс бойынша үкім шығарды, — деп хабарлайды Massaget.kz тілшісі.
Жамбыл облысының қылмыстық істер жөніндегі мамандандырылған ауданаралық сотында суық қаруды заңсыз алып жүргені және бұзақылық ниетпен адам өлтіруге оқталғаны үшін Ә.-ге қатысты қылмыстық іс қаралды.
Сотта не анықталды?
2025 жылы сәуірде сотталушы Меркі ауданындағы жанармай құю бекетінен шығып келе жатқанда жәбірленуші Я.-мен соқтығысып қалған. Сотталушы Ә. болмашы сылтауды пайдаланып, бұзақылық пиғылмен пышақты алып, жәбірленуші Я.-ның арқа тұсынан келіп, екі рет пышақ соққысын жасаған. Салдарынан жәбірленушінің арқасына және оң жақ кеуде тұсына жарақаттар салған.
Алайда жанында тұрған адамдар сотталушыны ұстап қалған, ал жәбірленуші Я. қашып үлгерген.
Сот шешімі
Сот үкімімен Ә. ҚК 287-бабының 1-бөлігі, 24-бабының 3-бөлігі — 99-бабы 2-бөлігінің 9) тармағы бойынша кінәлі деп танылып, оған түпкілікті 11 жыл 3 ай мерзiмге бас бостандығынан айыру жазасы тағайындалды.
Сот Ә.-ден 500 мың теңге моральдық зиян және 1,3 млн теңгеден аса залал сомасын өндірді. Үкім заңды күшіне енген жоқ.
Еске салайық, бұған дейін желіде оқиғаның видеосы пайда болды. Кадрларда мотоцикл жүргізушісі жанармай құю бағанына қарай келе жатқаны, оның артынан ер адам еріп келе жатқаны көрінеді. Бір кезде ер адам қалтасынан пышақ тәрізді нәрсе шығарып, мотоцикл жүргізушісіне бірнеше соққы жасайды.
Аптаның басты оқиғалары мен пайдалы видеоларды көру үшін YouTube арнамызға жазылыңыз
