Қостанайдағы Сырбай Мәуленов атындағы мектеп-гимназияда көрнекті ақынға арналған мемориалдық тақта орнатылды. Іс-шара барысында ақын, драма­тург Ақылбек Шаяхмет Сырағаңның Қостанайда қызмет еткен кезеңдерінен сыр шертсе, ақынның ұлы, заң ғылымдарының докторы Қасым Сырбайұлы мектеп ұжымына, шәкірттерге табыс тілеп, ризашылық білдірді.

Кезінде Сырағаңның әңгімесін көп тың­даған, қолына су құйып, дәмдес болған ақын Ақылбек Қожаұлы қа­лам­гер­­­­­дің шығармашылығы мен қызметіне кеңінен тоқталды.

«Сырбай Мәуленов – қазақ поэзиясында ерекше із қалдырған, ұлт өлеңіне жаңа форма әкелген ғажа­йып лирик ақын. Сұрапыл соғыс жылдары өзіміздің қарашаңырақ – бұрынғы «Большевиктік жол», қазіргі «Қостанай таңы» газетінде редактордың орынбасары болып қызмет атқарды. Елге сіңірген еңбегі зор еді. Ол кісінің өмірі өлмес шығармаларымен, осы гим­назиядағы жас ұр­пақтың білімімен жалғасып жатыр. Бүгінгі оқиғаның мәні терең. Ағамыздың ру­хы бір аунап түсіп жатқан шығар», деді ақын.

Еске алу кешінде Қасым Сырбайұлы өз атынан гимназия басшылығына, ұс­таз­дарға, білім ордасын үздік тәмамдаған бірнеше түлекке алғысхат табыс етті. Іс-шара гим­назияның мәжіліс залында жалғасын тауып, көпші­лік Сырбай ақынның өмірі мен шығармашылығына арналған деректі фильмді тамашалады.

Қостанай облысы