Түркістан облысында кейінгі жарты жылда 5 мыңнан астам бала түрлі жарақат алған. Әсіресе жаз мезгілінде оқыс оқиға көбейеді. Демалыста алаңсыз ойнап, суға түсіп, үй көрмейтін жеткіншектер қауіпсіздік шараларын естен шығарады.
Қаладағы барлық тұрғын үйдің ауласында ойын алаңы бар. Алайда ойынның қызығына түскен балалар қауіпсіздікті сақтай бермейді. Бірі әшкеншектен құласа, енді бірін самокат соғып кеткен. Дәрігерлер күйіп қалғандардың да көп екенін айтады. Мұндайда әр баланың амандығы мен саулығына ең алдымен ата-ана жауапты. Бір сәттік ойынның соңы ауыр жарақат әкелуі мүмкін, – дейді осындай жағдайды басынан өткерген ата-ананың бірі Сәуле Бегулиев.
Сәуле Бегулиева, қала тұрғыны:
- Әсіресе мына жас балалар сыртта жүргенде жүгіреді, секіреді. Сондай кезде аяқ-қолдарын жарақаттап алып жатады. Кіші балам жүгіріп, ойнап жүріп, құлап, жамбас сүйегіне өте қатты зақым келіп, травматолог дәрігерлердің арқасында екі рет операция жасатып, сондай бір әбіржіген кезіміз болды. Жазым аяқ астынан болып жатады. Жас аналар балаларыңыз сыртқа шыққан кезде қадағалап жүргендеріңіз дұрыс.
Травматологтар жаз мезгілінде балалар көп жарақат алатынын айтады. Мәселен, Түркістан қаласында жыл басынан бері 5 мыңнан аса бала жазатайым жағдайға ұшыраған. Оның ішінде 400-ге жуығының аяқ-қолы сынып, операция жасалған.
Ұлықбек Сайденов, травматолог:
- Қазір бізде енді «сезон» деп айтамыз ғой. Балалар сабаққа бармайды. Күндіз үйде аптап ыстық, кешкісін шығады. Ойын алаңдары көп, барады, ойнайды. Халықтың саны көбейді, жарақат та көбейді. Жол оқиғасы салдарынан келетіндер көбейді бізде. Үй жағдайында жарақат алатындар да көп. Қазір мысалға мынау 23 төсек орынның 10-ы күйікпен жатыр.
Аурухананың травмотология және ортопедия бөлімшесі сапалы медициналық құралдармен жабдықталған. Биылдан бастап бөлімшеде С-дуга аппарат жүйесі арқылы аурудың қай нүктеде екенін анықтауға мүмкіндік туып отыр. Бүгінде рентген сәулесіне негізделген аппарат балалардың жарақатын емдеуге сеп болуда, – дейді дәрігерлер.
Авторлары: Жандос Жұмабек, Қуаныш Әбуов
