Түркістан облысының Келес ауданында көпір опырылып құлады.
Жергілікті тұрғындар апатты видеоға түсіріп, әлеуметтік желіде жариялады. Аудан билігінің мәліметінше, Қошқарата ауылдық округінің аумағындағы көпір Келес өзені арқылы өтетін облыстық маңыздағы автожолдың бір бөлігі. Нысанның апатты жағдайда тұрғаны алдын ала анықталып, көлік қозғалысына шектеу қойылған. Дегенмен апат салдарынан ауызсу құбыры жарылып, екі ауылға су беру тоқтатылды. Қазір тұрғындарға суды тасымалдап жеткізіп жатыр. Одан бөлек көрші ауылға қатынап оқитын 50 бала мектепке бара алмай отыр. Олар әзірге онлайн оқитын болды. Жүзге жуық бүлдіршін де балабақшаға бармады. Қазір көпірді қалпына келтіру және көлік қатынасын реттеу жұмыстары жүріп жатыр.
Жеңіс Лесбаев, аудандық Төтенше жағдайлар бөлімінің бастығы:
- Оқиға салдарынан адам шығыны және зардап шеккендер жоқ. Шұғыл түрде аудандық төтенше жағдайлардың алдын алу және жою комиссиясының отырысы өткізіліп, аудан әкімінің, құзырлы мекемелерге халыққа айналма жолдар бойынша ақпараттандыру, сонымен қатар қатар полиция қызметіне тәуліктік кезекшілік ұйымдастыруды тапсырды.
