Ең басты жаңалық – тек әлеуметтік осал топ қана емес, соңғы бес жылда атына пәтер тіркелмеген кез келген азамат енді кезекке тұра алады.
Бір құшақ құжат жинап, түрлі мекемені жағалап жүретін күндер артта қалды. Енді үй кезегіне тұру үшін тек бір сілтеме жеткілікті, деп хабарлайды Сaravan.kz медиа порталы.
2025 жылдың 24 мамырынан бастап елімізде баспанаға мұқтаж азаматтар «Отбасы банкінің» жаңа цифрлық жүйесі арқылы өтінім бере алады. Бұл жүйе – Тұрғын үймен қамтамасыз ету орталығы деп аталады. Ең бастысы – барлығы толық автоматтандырылған.
Бәрі бір ғана порталда — orken.otbasybank.kz.
ЭЦҚ арқылы порталға кіресіз. Жүйе сіздің жасыңызды, соңғы бес жылда тұрғын үй иесі болмағаныңызды, отбасыңыздың әлеуметтік мәртебесін, табыс деңгейіңізді 14 мемлекеттік дерекқор арқылы тексереді. Егер бәрі дұрыс болса – бір күн ішінде кезекке қосыласыз.
Қосымша құжат қажет болса (мысалы, үй апатты жағдайда екенін дәлелдеу үшін) – өтінім 3 жұмыс күнінде қаралады. Демалыс күндері берілген өтінімдер келесі аптада өңделеді.
Бәрі ашық, бәрі әділ. Ең басты жаңалық – тек әлеуметтік осал топ қана емес, соңғы бес жылда атына пәтер тіркелмеген кез келген азамат енді кезекке тұра алады. Үйіңіз болмаса – кезекке тұруға құқығыңыз бар.
Өтінім берген соң 1414 нөмірінен SMS келеді. Онда дербес деректерді өңдеуге келісу сұралады. Бұл – міндетті қадам. Келісім бермесеңіз, өтінім де қабылданбайды.
