Алматылық дәрігерлер автокран мен автобус соқтығысынан зардап шеккен адамдардың жағдайы туралы хабарлады. Кеше Алматыда болған жол апатынан 23 адам жарақат алған еді. Көпшілігі автобус жолаушылары. Олардың төртеуі жеткіншек. Қалалық Қоғамдық денсаулық сақтау басқармасының хабарлауынша олар балалар ауруханасына жеткізілген. Жеті адамды №7 клиникалық ауруханаға апарған. Медициналық тексеруден өтіп, қажетті көмек көрсетілген соң олардың бәрі амбулаториялық ем алуға үйіне қайтарылды.
Сонымен қатар Алматы облысына қарасты көпсалалы клиникалық ауруханасының қабылдау бөліміне жеткізілген 12 зардап шегуші де тиісті ем шарадан соң үйлеріне жіберілді. Дәрігерлердің айтуынша, науқастардың жағдайы орташа ауыр және қанағаттанарлық.
Айта кетейік, кеше Боралдай тасжолында автокран жүргізушісі рөлге ие бола алмай, жолаушылар автобусы мен бірнеше жеңіл автокөлікке соғылған. Қазір сот-медициналық сараптама тағайындалып, тергеу жүріп жатыр.
Салтанат Әзірбек, Алматы қ. ПД ресми өкілі:
- Егер сот сараптамасы ауыр немесе орта дәрежедегі дене жарақаттарын анықтаса, онда қылмыстық іс қозғалады. Егер дене жарақаттары жеңіл болып табылса, бұл іс әкімшілік заңнама тұрғысында қарастырылады.
