2025 жылдың 1 жартыжылдығында Алматыда 220 ескі тұрғын үй иесі жаңа жайлы пәтерге көшті. Қоныс аудару жұмыстарын Алматы қаласы әкімдігінің «Алматы» ӘКК еншілес ұйымы «Қалалық күрделі құрылыс кәсіпорны» ЖШС мен инвесторлар «Алматы қаласының тұрғын үйді жаңарту бағдарламасы – 2030» аясында жүзеге асырып отыр, деп хабарлайды Egemen.kz.
Алматылықтар жаңа баспананы «бөлме орнына бөлме» қағидаты бойынша немесе бұрынғы тұрғын үйінің нарықтық құнына сәйкес өтемақы алу арқылы иеленіп отыр. Жаңарту бағдарламасы аясында барлық пәтер толық әрленіп, дайын күйінде берілді. Үйлерге интернет жүргізіліп, өртке қарсы дабыл жүйесі, сантехника, фаянс, газ немесе электр плитасы орнатылған.
Сонымен биыл ең тұрғыны көп Түрксіб ауданында – 99 адам, Алмалы ауданында – 57, Жетісу ауданында – 32, Әуезов ауданында – 20, Бостандық ауданында – 7, Алатау ауданында – 3 және Медеу ауданында – 2 адам жаңа пәтерге қоныстанды.
Бағдарламаға сәйкес, көшіру мен ғимараттарды сүру жұмыстары барлық меншік иелерінің келісімімен ғана жүргізіледі. Ерекше күтімді қажет ететін адамдар үшін бірінші қабаттан немесе жеделсаты, пандусы, кедергісіз қолжетімділігі бар үйлерден пәтер қарастырылған. Қала тұрғындарының қауіпсіздігін қамтамасыз ету мақсатында әсіресе, қамысты үйлер мен тектоникалық жарық аймағында орналасқан ғимараттарды сүруге ерекше көңіл бөлінеді.
Берілген баспанаға көшуден бас тартқан жағдайда тұрғындар ескі үйде тұра береді, бірақ ықтималды қауіп-қатерлерге өздері жауапты болады.
Биыл жыл соңына дейін «Қалалық күрделі құрылыс кәсіпорны» мен инвесторлардың күшімен тағы 600-ден астам адамды жаңа тұрғын үймен қамтамасыз ету жоспарланып отыр.
«Жаңарту бағдарламасы кешенді тәсілге негізделген. Тұрғын үй ғана емес, сонымен бірге қала тұрғындарының өмір салты өзгереді: жайлы орта қалыптасып, жаңа қоғамдық кеңістіктер, жұмыс орындары мен қызметтер пайда болады. Сонымен қатар, Алматының сәулеттік келбеті жаңарады. 2030 жылға дейін қаладағы ескі үйлердің санын 1 366-дан 690-ға дейін азайтып, шамамен 7 500 меншік иесін заманауи пәтерге көшіру жоспарланып отыр», деді «Қалалық күрделі құрылыс кәсіпорны» ЖШС басқарма төрағасы Ринат Құрманов.
«Алматының тұрғын үйді жаңарту бағдарламасы – 2030» қалалық әкімдік тарапынан әзірленіп, 2024 жылдың қараша айында мәслихат бекіткен болатын. Бағдарламаны «Алматы» ӘКК» АҚ әкімшілігі мен уәкілетті ұйым Алматы қаласы әкімдігінің «Қалалық күрделі құрылыс кәсіпорны» ЖШС жүзеге асырып отыр.
