Алматыдағы №1 облыстық балалар үйінің тәрбиеленушілері Қонаев қаласындағы жаңа ғимаратқа көшірмеу туралы өтінішпен бейнеүндеу жариялады, — деп хабарлайды Massaget.kz тілшісі.
Өтініш авторлары бұған дейін Алматы облысының әкімі Марат Сұлтанғазиевпен, Білім басқармасының өкілдері және Бала құқықтары жөніндегі уәкіл Динара Зәкиевамен кездесуге қатысқанын айтты. Олардың сөзінше, сол кезде шенеуніктер мекемені көшірмеуге уәде берген.
"Балалар үйіне тиіспейміз деді, бірақ үш ай өтті, тағы да айғай-шу басталды. Балалар үйін Қонаевқа көшіру туралы бұйрық шыққанын көрдік. Неліктен? Сұрақ. Шенеуніктер, әкімдер, жауаптылар, бұл не? Балаларды жайына қалдырыңыздар", — деді балалар үйінің тәрбиеленушілері.
Тәрбиеленушілердің айтуынша, жаңа нысан орналасқан жерде сапалы емханалар, ауруханалар жоқ.
"Бүкіл балалар үйінің атынан заманауи, отбасылық үлгідегі балалар үйін сұрағымыз келеді. Басқа бай адамдар сұрағандай көп нәрсе сұрап жатқан жоқпыз", — деп жазылған үндеуде.
Бұған дейін не болды?
2025 жылы наурызда №1 облыстық балалар үйінің тәрбиеленушілері мекеме Алматыдан Қонаев қаласына көшіріліп жатқанына шағымданды. Олардың үндеуі әлеуметтік желілерде пайда болды.
Кейінірек Алматы облысының әкімі Марат Сұлтанғазиев Алматы қаласындағы №1 балалар үйінің тәрбиеленушілерімен кездескен болатын.
"Біздің мақсатымыз — балалар өзін қауіпсіз сезініп, жан-жақты дамуы үшін қолайлы орта қалыптастыру. №1 балалар үйінің тәрбиеленушілері Алматыда қалады, ал жаңадан келетін балалар Қонаев қаласындағы заманауи кешенге орналастырылады", — деді бұған дейін өңір әкімі Марат Сұлтанғазиев.
Алайда Мәжіліс депутаты Бақытжан Базарбек әлеуметтік желіде Алматы облысы Білім басқармасының 2025 жылғы 10 шілдедегі "Арнаулы әлеуметтік қызметтерге мұқтаж балаларды қолдаудың облыстық орталығы" КММ-нің орналасқан жерін өзгерту туралы" бұйрығын жариялады.
Ал Алматы облысы әкімдігі мәліметінше, мекеме Қонаевқа көше бастаған, себебі мекеме орналасқан ғимарат апат жағдайында тұр.
Instagram парақшамызға жазылып, ең қызықты ақпараттарды бірінші болып оқыңыз!
