«Алматы жылу желілері» тұрғындардың жылу энергиясы үшін төлемеген миллиардтаған қарызды сот арқылы өндіріп алмақ. Осы істің барысында мүлік пен банк шоттарына, шетелге шығуға тыйым салынатын болды. Сонымен қатар қарызды толық төлемей оларға ыстық су беру тоқтатылады, деп хабарлайды Egemen .kz.
Қарыздарын өтемегені туралы бірнеше рет ескерту алғанына қарамастан, тұтынушылардың бір бөлігі коммуналдық қызметті жеткізушінің заңды талаптарын елемейтін жағдайлар орын алған.
Биыл жыл басынан бері Алматыда жылу энергиясы үшін төлем жасамаған 600-ден астам абонентке ыстық су беру шектелген. Сонымен қатар заңды тұлғаларға сотқа дейінгі 3345 талап жіберілді.
Жылу және ыстық сумен жабдықтау үшін қарызы бар 5184 тұрғыннан қарызды өндіріп алу бойынша жұмыс жүргізілді. Ол үшін сотқа талап-арыз берілді, сондай-ақ нотариустарға атқарушылық жазбалар жасау үшін арыздар жіберілді.
Бүгінде сот орындаушылары қарызды өндіріп алу іс-шараларын жалғастырып жатыр. Коммуналдық қызметке төлем жасамаған 1 754 борышкерге қатысты шектеу шаралары қабылданды.
Мысалы,926 борышкердің жылжитын және жылжымайтын мүлкіне тыйым салынды.
822 банктік шот бұғатталды.
254 борышкерге қатысты Қазақстан Республикасынан тыс жерлерге шығуға тыйым салынды
144 азаматтың жалақысы мен өзге де табысынан берешек ұсталды.
Қазіргі таңда Алматы жылу тұтынушыларының пайдаланған ыстық су мен жылу үшін жиынтық қарызы шамамен 2 млрд теңгеге жетті.
